O‘zbеkistоn Rеspublikаsi Yoshlar ishlari agentligi

Volontyorlik faoliyatiga oid mabuot anjumani o‘tkazildi

Mamlakatimizda volontyorlik faoliyatini amalga oshirishning huquqiy asoslari yaratilishi munosabati bilan ushbu faoliyatni rivojlantirishga qaratilgan tizimli ishlar amalga oshirilmoqda. Jumladan, bugungi kunda jami 102 ming nafar yoshlarni qamrab olgan 200dan ortiq volontyorlik guruhlari doimiy faoliyat olib bormoqda.

Hududlardagi Yoshlar markazlarida O‘zbekiston volontyorlari assotsiatsiyasi tashabbusi bilan Yoshlar ishlari agentligi ko‘magida “Volontyorlar maktabi” tashkil etilib, 7,3 ming nafar yosh volontyorlar o‘qitildi. Ushbu volontyorlar tomonidan 100 mingdan ortiq ijtimoiy himoyaga muhtoj, nogironligi bo‘lgan va kam ta’minlangan hamda yolg‘iz qariyalari mavjud oilalarga 400 dan ortiq ijtimoiy loyihalar orqali ko‘maklashildi. O‘zbekiston Respublikasi Vazirlar Mahkamasining “Volontyorlik faoliyatini yanada qo‘llab-quvvatlash chora-tadbirlari to‘g‘risida” 2022 yil 11 apreldagi 169-son qaroriga muvofiq, Yoshlar ishlari agentligining budjetdan tashqari mablag‘lar hisobidan har yili eng yaxshi volontyorlik loyihalarini amalga oshirish uchun volontyorlik guruhlari va volontyorlik tashkilotlariga har bir loyiha uchun BHMning 200 baravarigacha miqdorida mablag‘ ajratilmoqda.

2023 yilning iyun oyida Yoshlar ishlari agentligi tomonidan volontyorlik loyihalarini qo‘llab-quvvatlash bo‘yicha e’lon qilingan tanlovga ekologiya, ta’lim, tibbiyot, media, turizm yo‘nalishlari bo‘yicha 218 ta loyihalar kelib tushdi. Kelib tushgan loyihalar ekspertlar tomonidan saralanib g‘olib deb topilgan 70 ta loyihani moliyalashtirish 2024 yilning fevral oyidan boshlanadi. Shuningdek, 2023 yilning fevral oyida O‘zbekistonda volontyorlarni doimiy ro‘yxatga olish va ularga uslubiy ko‘mak berish bo‘yicha Yoshlar portali negizida ishga tushirilgan volontyor.uz platformasi orqali bugungi kunga qadar jami 5 333 nafar faol volontyorlar ro‘yxatdan o‘tdi. Bundan tashqari o‘zbek tilida volontyorlik uchun 5 ta videodarslar ishlab chiqilib mazkur platformaga joylashtirildi. “Volontyorlik faoliyati to‘g‘risida”gi O‘zbekiston Respubilikasi Qonuniga o‘zgartirish va qo‘shimchalar kiritish bo‘yicha Qonun loyihasi tayyorlanib, O‘zbekiston Respubilkasi Oliy Majlis Qonunchilik palatasiga taqdim qilindi. Qonunchilik palatasi deputatlari tomonidan ko‘rib chiqilgan Qonun loyihasi Oliy Majlis Senati tomonidan ma’qullangandan so‘ng 2023 yilning 18 avgustida O‘zbekiston Respublikasi Prezidenti tomonidan tasdiqlandi.

“Yashil makon” umumilliy loyihasini amalga oshirish va yoshlar orasida ekologik madaniyatni shakllantirish yo‘nalishida. “Yashil makon” umummilliy loyihasining 2023 yil kuz mavsumida Yoshlar ishlari agentligi tomonidan mahalliy hokimliklar bilan hamkorlikda respublikaning barcha hududlarida “Yoshlar hashari” – daraxt ko‘chatlarini ekish aksiyasi tashkil etildi. Mazkur aksiyada 17 ming 708 nafar yosh volontyorlar qatorida yosh tadbirkorlar, yosh kitobxonlar, “Zulfiya” nomidagi davlat mukofoti savrindorlari, blogerlar, sportchilar, san’atkorlar, “Kelajak liderlari”, talabalar va yosh olimlar ishtirok etishdi.

Aksiya davomida sug‘orish tizimlari yo‘lga qo‘yilib, daraxt ekishga tayyorlangan 300 gektar maydonga pavloniya, oqterak, majnuntol, gilos, archa, tut kabi 170 mingdan ziyod daraxt ko‘chatlari ekilgan bo‘lsa, shundan, bevosita 165 300 tasi yashilmakon.eco platformasiga kiritildi hamda mahalliy hokimliklar bilan hamkorlikda ekilgan daraxt ko‘chatlarini doimiy parvarish qilish bo‘yicha manzilli chora-tadbirlar belgilab olindi. Shuningdek, hududlardagi 9 440 ta mahallalarda eko-volontyorlar tomonidan tashkil etilgan “Yashil makon chellenj”, “Media kislorod”, “Yoshlar bog‘i”, “Yosh ekolog”, “Imkoniyati cheklanganlar bog‘i”, “Bir yoshga bir nihol” tadbirlarida 700 ming nafar yoshlar ishtirok etdi. Ishtirokchi yoshlar uchun daraxt ko‘chatlarini to‘g‘ri tanlash, ekish, intensiv yetishtirish va sifatli parvarish qilish hamda tabiiy resurslardan unumli foydalanishga qaratilgan o‘quv-amaliy seminarlar, treninglar tashkil etildi.

Volontyorlik faoliyatini yanada rivojlantirish maqsadida 2024 yilda amalga oshiriladigan ishlar: 2023 yilda volontyorlik loyihalarini moliyalashtirish bo‘yicha o‘tkazilgan tanlov g‘oliblari (volontyorlik tashkiloti va guruhi rahbarlari)ni joriy yilning fevral oyida o‘qitish va mart oyidan boshlab 70 ta loyihani bosqichma-bosqich moliyalashtirib borish. volontyor.uz platformasini qayta ko‘rib chiqib, O‘zbekistondagi volontyorlarni bosqichlash, hamda doimiy rag‘batlantirib borish tizimini yaratish. O‘zbekiston Respublikasi Prezidenti huzuridagi Ijtimoiy himoya milliy agentligi bilan hamkorlikda ijtimoiy volontyorlarni tizimli birlashtirish va “Inson” markazlariga jalb qilish; O‘ztelekom bilan hamkorlikda joriy qilingan “Volontyor” tarif rejasini barcha volontyorlar uchun yanada qulay, arzon, sifatli va imtiyozli tarif rejaga aylantirish.

Mart-aprel oyida volontyorlar madhiyasini yaratish. Bunda, volontyorlar o‘z namunasi bilan insonlarni harakatlantirish ilhomlantirish, ularda vatanparvarlik va insoniylik tuyg‘ularini shakllantirish g‘oyasi asosida taniqli san’atkorlar tomonidan ijro etiladi. 2024 yil Mustaqil davlatlar hamdo‘stligiga a’zo davlatlarda “Volontyorlar yili” deb e’lon qilindi. Shu munosabat bilan MDH tomonidan tasdiqlangan “Yo‘l xaritasi”ga muvofiq, O‘zbekistonda joriy yilda quyidagi tadbirlar amalga oshiriladi:

May – Toshkent shahrida Markaziy Osiyo davlatlari o‘rtasida “Volontyor yoshlar forumi” o‘tkaziladi; “Ezgulik yo‘lida” shiori ostida volontyorlar ishtirokida xalqaro volontyorlar festivali hamda onlayn-koferensiya o‘tkaziladi; MDH davlatlarining volontyorlik tarmoqlari (assotsiatsiyalar) rahbarlari tomonidan taqdim etilgan mintaqaviy ekspertlar ishtirokida MDHga a’zo davlatlarning volontyorlarini ilmiy-marifiy qo‘llab-quvvatlash bo‘yicha yagona strategiya ishlab chiqishadi. 2024 yil volontyorlik loyihalarini moliyalashtirish bo‘yicha tanlovni o‘tkazish va natijalarini “Xalqaro volontyorlar kuni”da e’lon qilish. “Yil volontyori – 2024” tanlovi doirasida 50 ta nominatsiyada namunali volontyorlarni belgilash.

Shuningdek, yil davomida hududlardagi “Volontyorlar maktablari” mentorlari, Volontyorlik guruhlari va Volontyorlar markazlari kordinatorlari hamda volontyorlari uchun o‘quv seminarlar, festival va boshqa tadbirlar amalga oshiriladi.