O‘zbеkistоn Rеspublikаsi Yoshlar ishlari agentligi

Navro‘z – bu nafaqat qadimiy bayram, balki tabiatning uyg‘onishi, yangi hayotning boshlanishi va inson qalbidagi yangilanish ramzidir. O‘zbekistonda 21-mart kuni Navro‘z umumxalq bayrami sifatida keng nishonlanadi va dam olish kuni hisoblanadi. Ushbu sanada kecha va kunduz tenglashadi, bu esa koinotda muvozanat o‘rnatilganligini bildiradi.  Navro‘z inson hayotida ham yangilanish, qalb pokligi, mehr-oqibat, do‘stlik va birodarlikni mustahkamlash bayrami sifatida qabul qilinadi.

Navro‘z so‘zi fors tilidan tarjima qilinganda “yangi kun” degan ma’noni anglatadi. Bu bayram ming yillar davomida Sharq xalqlari tomonidan nishonlab kelinadi va u zardushtiylik davridan boshlab o‘z o‘rniga ega bo‘lgan. Navro‘z qadimda dehqonchilik va chorvachilik bilan shug‘ullanuvchi xalqlarning yangi yil kirib kelishini nishonlash marosimi sifatida paydo bo‘lgan. Bahorning boshlanishi bilan yangi hosilga umid, yangi yilga ezgu niyatlar qilinadi.