“Yashil innovatsiyalar” tanlovining hududiy bosqichlari o‘z nihoyasiga yetdi!
2026-04-13 19:10:00 / Yangiliklar
Mamlakatimizda ekologik barqarorlikni ta’minlash, ilg‘or g‘oyalarni qo‘llab-quvvatlash hamda yashil iqtisodiyot tamoyillarini keng joriy etish maqsadida “Yashil tashabbuslar jamg‘armasi” tomonidan tashkil etilgan “Yashil innovatsiyalar” ko‘rik-tanlovining hududiy bosqichlari yakunlandi.
Quvonarlisi shundaki, ushbu ekologik loyihaga respublikamizning barcha 14 ta hududidan jami 420 ta ariza kelib tushdi. Taqdim etilgan g‘oyalar ekspertlar tomonidan dolzarblik, samaradorlik va amaliy ahamiyat mezonlari asosida atroflicha baholanib, eng kuchli 85 ta innovatsion loyiha respublika bosqichiga saralab olindi.
Saralangan loyihalar asosan quyidagi muhim yo‘nalishlarni qamrab olgan:
- atrof-muhitni muhofaza qilish;
- resurslardan samarali foydalanish;
- energiya tejamkor texnologiyalarni joriy etish;
- iqlim o‘zgarishiga moslashuv choralarini ishlab chiqish.
Tanlovning hal qiluvchi respublika bosqichiga yo‘llanma olgan barcha loyiha mualliflariga omad va ulkan zafarlar tilab qolamiz!