“Prezident sovg‘asi” o‘z egasini topdi: “Yosh kitobxon oila” tanlovi g‘oliblari aniqlandi!
2026-03-06 22:00:00 / Yangiliklar
Mamlakatimizda kitobxonlik madaniyatini keng targ‘ib etish, ilmga chanqoq yoshlar va oilalarni munosib rag‘batlantirishga doimiy ravishda yuksak e’tibor qaratib kelinmoqda. Ana shunday ezgu maqsadlarni o‘zida mujassam etgan “Yosh kitobxon oila” tanlovining 2025-yilgi Respublika bosqichi g‘oliblari aniqlandi.
Katta tayyorgarlik va kuchli intellektual salohiyat talab etilgan ushbu murosasiz bellashuv yakunlariga ko‘ra, eng bilimdor oilalar munosib e’tirof etildi:
1-o‘rin: Toshkent viloyatidan Eshonqulovlar oilasi. Ular mutlaq g‘olib sifatida “Prezident sovg‘asi” — “BYD” elektromobilini qo‘lga kiritishdi!
2-o‘rin: Toshkent shahridan Sattorovlar oilasi — 50 million so‘m pul mukofoti;
3-o‘rin: Andijon viloyatidan Maxammadjonovlar oilasi — 30 million so‘m pul mukofoti.
Shuningdek, ushbu nufuzli final bosqichiga qadar yetib kelgan barcha ishtirokchi oilalarga 10 million so‘mdan pul mukofoti hamda kitoblar to‘plami topshirildi.
Respublika komissiyasi a’zolari taqdirlash marosimida ishtirok etib, barcha g‘olib va sovrindorlarga kelgusida yuqori marralarni zabt etishlarida omad tilashdi. Oilaviy kitob mutolaasi va ilm izlash barakasidan aslo uzoqlashmang!