Agentlik direktorining murojaati
2026-02-20 15:30:00 / Rahbariyatning bayonotlari va nutqlari
Hurmatli yurtdoshlar, aziz hamkasblar va shijoatli yoshlar!
Taraqqiyotimizning yangi bosqichida adolatli va farovon davlat qurish yo‘lidagi eng jiddiy to‘siqlardan biri — korrupsiyadir. Bu illat shunchaki qonunbuzarlik emas, balki millat kelajagi, xususan, yoshlarimizning ertangi kuniga qilingan xiyonat, jamiyat taraqqiyotiga solingan jiddiy tahdiddir. Davlat xizmatida faoliyat yuritayotgan har bir inson uchun halollik va vijdoniylik faqatgina kasbiy majburiyat emas, balki qat’iy hayotiy e’tiqod bo‘lishi shart.
Muhtaram Prezidentimiz o‘z nutqlarida korrupsiyaning davlat tuzumiga, jamiyat barqarorligiga va fuqarolar ishonchiga salbiy ta’sirini doimo ta’kidlab, barchamizni bu illatga qarshi hushyorlikka chaqirgan edilar:
“Davlat tuzumini ichidan yemiradigan, ijtimoiy barqarorlik kushandasi bo‘lgan korrupsiya balosiga qarshi, byurokratiyaning har qanday ko‘rinishlariga, odamlarni mensimaslik, mahalliychilik va guruhbozlik illatlariga qarshi barchamiz keskin kurash olib borishimiz kerak.”
Bugungi kunda mamlakatimizda korrupsiyaga qarshi kurashishning ilg‘or xalqaro standartlarga mos, ochiqlik va shaffoflikka asoslangan mutlaqo yangi huquqiy tizimi ishlamoqda. Yoshlar ishlari agentligi ham bu jarayonlarda shunchaki kuzatuvchi emas, balki asosiy tashabbuskor bo‘lib maydonga chiqmoqda. Barcha jarayonlarni to‘liq raqamlashtirish, inson omilini kamaytirish va yoshlar bilan to‘g‘ridan-to‘g‘ri, ochiq muloqot o‘rnatish yo‘lidagi tizimli ishlarni izchil davom ettiryapmiz.
O‘tgan davr mobaynida Agentligimizda korrupsion xavf-xatarlarni barvaqt aniqlash, tahlil qilish va oldini olish maqsadida joriy qilingan ichki nazorat (komplayens) tizimi o‘zining amaliy natijalarini bermoqda. Biz faqatgina oqibatlar bilan kurashish emas, balki ularni keltirib chiqaruvchi sabab va sharoitlarni tag-tomiri bilan yo‘q qilish bo‘yicha qat’iy profilaktika choralarini ko‘rmoqdamiz.
Aziz hamkasblar, hududlardagi fidoyi yoshlar yetakchilari!
Barchangizni korrupsiyaning har qanday ko‘rinishiga nisbatan mutlaqo murosasiz bo‘lishga, faoliyatimizda adolat, ochiqlik va poklikni bosh mezon qilib olishga chaqiraman. Biz yoshlar ongida korrupsiyaga nisbatan qat’iy “murosasizlik immuniteti”ni shakllantirishimiz, o‘zimiz ularga shaxsiy namuna bo‘lishimiz zarur.
Tizimda adolatni ta’minlashda jamoatchilik nazorati juda muhimdir. Agar Agentlik faoliyatida korrupsiya bilan bog‘liq biror holatga guvoh bo‘lsangiz, yoxud o‘z taklif va mulohazalaringiz bo‘lsa, rasmiy aloqa kanallarimiz hamda ishonch telefonlari orqali bizga zudlik bilan xabar berishingizni so‘raymiz. Har bir murojaat shaxsan mening qat’iy nazoratimda bo‘ladi.
Unutmaylik, yoshlarga toza, shaffof va halol tizim kerak! Birgalikda korrupsiyadan xoli muhit yaratish — nafaqat bugungi maqsadimiz, balki yorug‘ kelajagimiz kafolatidir!
Hurmat bilan,
Alisher SA’DULLAYEV
O‘zbekiston Respublikasi Yoshlar ishlari agentligi direktori