O‘zbеkistоn Rеspublikаsi Yoshlar ishlari agentligi

Bugun Oliy Majlis Qonunchilik palatasining Yoshlar masalalari bo‘yicha komissiyasi, Yoshlar ishlari agentligi va Qonunchilik palatasi huzuridagi Yoshlar parlamenti tashabbusi bilan vazirlik va idoralarning yoshlar masalalari bo‘yicha maslahatchilari ishtirokida ochiq muloqot o‘tkazildi.

Muloqot avvalida Yoshlar masalalari bo‘yicha komissiya raisi Shaxnoza Joldasova davlatimiz rahbari tashabbusi bilan yoshlar salohiyatini ro‘yobga chiqarish, ularni har tomonlama qo‘llab-quvvatlash, intellektual va ijtimoiy o‘sishi uchun zarur sharoitlar yaratish borasida keng ko‘lamli islohotlar amalga oshirilayotganini ta’kidladi.

Xususan, O‘zbekiston Respublikasi Prezidenti rahbarligida o‘tkazilayotgan har bir yig‘ilish va qabul qilinayotgan har bir qarorda yoshlar masalasiga alohida e’tibor qaratilayotgani, ular uchun qo‘shimcha imkoniyatlar yaratilayotgani hamda islohotlar mahallagacha yetkazilayotgani qayd etildi.

Muloqotda respublikamizdagi 42 ta vazirlik, idora va tashkilot rahbarlarining yoshlar masalalari bo‘yicha maslahatchilari ishtirok etdi. Jumladan, Mudofaa vazirligi, Adliya vazirligi, Favqulodda vaziyatlar vazirligi, Energetika vazirligi, “Kadastr” agentligi, “Xalq banki” ATB, “O‘zbekko‘mir” AJ kabi idoralar tomonidan yoshlarga oid davlat siyosati yo‘nalishida amalga oshirilayotgan ishlar yuzasidan axborotlar tinglandi.

Taqdimotlar davomida:

• Mudofaa vazirligi tizimida 2025-yil davomida yoshlar va yosh harbiy xizmatchilarning intellektual, badiiy va ijodiy qobiliyatlarini rivojlantirish bo‘yicha keng qamrovli ishlar amalga oshirilgani, 14 622 nafar biriktirilgan yosh bilan ishlashning yagona mexanizmi joriy etilgani, 5 218 ta ijtimoiy muammo aniqlangani va ulardan 4 868 tasi ijobiy hal etilgani ma’lum qilindi.

• Adliya vazirligi tizimida 2 510 nafar yosh faoliyat yuritayotgani, yoshlar bilan ishlashning tashkiliy-huquqiy asoslarini mustahkamlash maqsadida Adliya vazirligi huzurida Yoshlar kengashi tashkil etilgani, shuningdek, huquqbuzarliklarning oldini olish bo‘yicha 200 dan ortiq huquqiy targ‘ibot tadbirlari va davra suhbatlari o‘tkazilgani qayd etildi.

• Favqulodda vaziyatlar vazirligi tizimida yoshlarga ko‘rsatilayotgan e’tibor natijasida 2 719 nafar yosh og‘ir toifadan chiqarilgani, 478 nafar yosh ta’lim jarayoniga qaytarilgani, 5 140 nafar yosh giyohvandlik va zararli g‘oyalardan xalos qilinganini hamda 575 nafar ishsiz yosh doimiy ishga joylashtirilganini ta’kidlashdi.

• Energetika vazirligi tizimida yoshlarga ko‘rsatilayotgan e’tibor, otaliqqa olingan yoshlar bilan ishlash bo‘yicha yangi tashabbuslar, davlat ulushi mavjud tashkilotlar va tijorat banklarda yosh mutaxassislar bilan amalga oshirilayotgan ishlar yuzasidan fikr-mulohazalar bildirildi.

Yig‘ilish yakunida Yoshlar masalalari bo‘yicha komissiya hamda Yoshlar parlamenti a’zolari soha rivoji bo‘yicha o‘z taklif va tavsiyalarini bildirdilar.