O‘zbekiston Respublikasi Oliy Majlisi Qonunchilik palatasi Spikeri Nurdinjon Ismoilov Namangan viloyatida iqtisodiy-ijtimoiy sohalarda amalga oshirilayotgan ishlar bilan tanishdi.
2025-10-10 22:25:00 / Yangiliklar
Dastlab Namangan viloyati hokimi Shavkatjon Abdurazzoqov hamrohligida To‘raqo‘rg‘on tumanida g‘o‘za seleksiyasi va urug‘chiligi ilmiy-tajriba stansiyasiga qarashli xo‘jalikda paxta hosili va terim jarayonlari ko‘zdan kechirildi. Xorijiy nav, qo‘shqator ekish va tomchilatib sug‘orish natijasida maydonlarda kutilganidan ziyoda sanoat xom ashyosi yetishtirildi. Birinchi terimning o‘zidayoq 50-60 sentnerdan hosil yig‘ishtirib olinmoqda.
Dala maydonida terimchilar bilan suhbatlashib, sovg‘alar taqdim etildi.
Shuningdek, Axsikent arxeologiya yodgorligida olib borilayotgan bunyodkorlik ishlari bilan tanishildi.
Tashrif davomida tuman hududidagi yangi “Namangan” erkin iqtisodiy zonasi, unda amalga oshirilayotgan 9 ta yirik loyihalar bo‘yicha ham Spikerga ma’lumot berildi.
Shuningdek, Mingbuloq tumanida amalga oshirilayotgan 151 million dollarlik “Artmen” tekstil loyihasi bilan tanishildi. Loyihaning ishga tushishi bilan 2000 ta yangi ish o‘rni yaratiladi.