Uychi tumanida “Ilk rivojlanish markazi” ochildi
2025-09-29 18:58:00 / Yangiliklar
Namangan viloyatining Uychi tumanida Prezidentimizning 2024-yil 23 sentabrdagi “Kambag‘allikdan farovonlik sari” dasturini amalga oshirish bo‘yicha birinchi navbatdagi chora-tadbirlar to‘g‘risida”gi hamda Vazirlar Mahkamasining 2025-yil 14 iyuldagi “Ilk rivojlanish markazlari faoliyatini bosqichma-bosqich yo‘lga qo‘yish chora-tadbirlari to‘g‘risida”gi qarorlari ijrosini ta’minlashga qaratilgan yana bir “Ilk rivojlanish markazi” ish boshladi.
Ochilish marosimida Namangan viloyati hokimi o‘rinbosari Otabek Bazarov, soha mutasaddilari va jamoatchilik faollari ishtirok etdi.
Ta’kidlandiki, ushbu markaz hududdagi ehtiyojmand oilalar farzandlarini maktabgacha ta’lim tizimiga bepul qamrab oladi. Ularning jamiyatga moslashishi, qobiliyatlarini rivojlantirish va kelgusida muvaffaqiyatli ta’lim olishiga xizmat qiladi.
Eslatib o‘tamiz, bugungi kunga qadar Namangan viloyatida 4 ta tuman va shaharda “Ilk rivojlanish markazi” faoliyati yo‘lga qo‘yilib, 600 nafarga yaqin kam ta’minlangan oilalar farzandlarini maktabgacha ta’lim bilan qamrab olish imkoniyati yaratilgan.
Viloyat MMTB Axborot xizmati.