Korrupsiyaga qarshi kurashish agentligi direktori Akmal Burxonov Namangan viloyati yoshlari bilan uchrashdi
2024-02-10 18:03:00 / Yangiliklar
Ochiq muloqot shaklida oʻtgan tadbirda mamlakatimizda keyingi yillarda korrupsiyaga qarshi kurashish va uni oldini olish borasida amalga oshirilayotgan tizimli ishlar, shu jumladan korrupsiyani oldini olishga qaratilgan preventiv choralar, sohaga oid qabul qilingan normativ-huquqiy hujjatlar mazmun-mohiyati, mazkur yoʻnalishda xorijiy davlatlarning ilgʻor tajribalarini mamlakatimizda ham joriy etish borasida Agentlik va hamkor tashkilotlar tomonidan amalga oshirilayotgan ishlar haqida batafsil maʼlumotlar berib oʻtildi.
Yoshlar tomonidan bildirilgan takliflar orasida, ayniqsa, korrupsiyaga qarshi kurashishni boshlangʻich taʼlim olishdan boshlash, yoshlar ongida korrupsiyaga qarshi murosasiz munosabatni sodda tarzda tushuntirishga qaratilgan qisqa metrajli roliklarni muntazam ravishda berib borish, ijtimoiy reklama vaqtini koʻpaytirish, alohida telekanal tashkil etish, korrupsiya holatlari eng koʻp uchrayotgan sohalarni raqamlashtirish orqali inson omilini cheklash hamda sohaga oid adabiyotlarni koʻpaytirish kabi dolzarb masalalar oʻrtaga tashlandi.
Jami 150 nafardan ziyod namanganlik yoshlar ishtirok etgan tadbirda Agentlik direktori hamda Namangan viloyati hokimining oʻrinbosari Gʻulomjon Murodxoʻjayev 30 nafarga yaqin yoshlarning savollari va tushgan takliflariga javoblar berdilar.
Oʻrinli va asosli, deb topilgan takliflar kelgusida oʻrganib chiqilib, qonunchilik hujjatlarini ishlab chiqish va amaliyotga joriy etishda inobatga olinishi qayd etildi.
Namangan viloyati hokimligi
Axborot xizmati