64-xalqaro "Gullar festivali" doirasida Namanganda xalqaro ekspeditsiya a’zolari tantanali kutib olindi va biznes-muloqot o‘tkazildi
2025-07-11 16:20:00 / Yangiliklar
Ekspeditsiya tarkibida Rossiya, Qozog‘iston, Qirg‘iziston, Belarus, Tojikiston, Vengriya, Germaniya, Fransiya kabi mamlakatlardan kelgan nufuzli olimlar, tadqiqotchilar, jurnalistlar, blogerlar va tadbirkorlar qatnashdi.
Tadbirda Namangan viloyati hokimining o‘rinbosari Botir Nuritdinov so‘zga chiqib, mehmonlarni samimiy qutladi. Namanganning sanoat salohiyati, eksport imkoniyatlari, investitsiya muhiti hamda madaniy turizm borasidagi yutuqlarini alohida ta’kidladi.
Shundan so‘ng, ekspeditsiyasining tashkiliy qo‘mitasi raisi Islom Nazaraliyev so‘zga chiqib, O‘zbekiston, xususan, Namangan viloyatida xalqaro muloqot va do‘stona aloqalar rivojlanayotganini ta’kidlab, ushbu tashrif ikki tomonlama manfaatli hamkorlikni kengaytirishda muhim qadam bo‘lishini alohida qayd etdi.
Muloqot davomida mehmonlarga milliy kuy-qo‘shiqlar va raqslardan iborat madaniy dastur ham namoyish etildi. Go‘zal va mazmunli ijrolar xalqaro delegatsiya a’zolarida katta taassurot qoldirdi.
Forumda “Amazon”, “Alibaba”, “Wildberries”, “Uzkotton” kabi xalqaro kompaniyalar vakillari, shuningdek, Namangan viloyatida faoliyat yuritayotgan eksportchi korxonalar ishtirok etdi. Yig‘ilishda raqamlashtirish, logistika, xalqaro bozorlarga chiqish va ilg‘or tajribalar bo‘yicha qator ma’ruzalar tinglandi.
Xususan, videokonferensiya orqali Rossiya Federatsiyasining O‘zbekiston Respublikasidagi Savdo vakili vazifasini bajaruvchi Igor Kamыnin ham ma’ruza qildi.
Ushbu uchrashuvlar Namangan viloyatining xalqaro imijini yanada mustahkamlash, investitsion jozibadorligini oshirish va turizm salohiyatini namoyon etishda muhim qadam bo‘ldi.