Kosonsoy tumanida “Yangi O‘zbekiston yoshlari, birlashaylik!” shiori ostida "Yoshlar festivali" bo‘lib o‘tdi
2025-06-15 08:00:00 / Yangiliklar
Dastlab, “Namuna” mahallasida joylashgan markaziy o‘yingohning ochilish marosimi o‘tkazildi. Nuroniylar ishtirokida ramziy lenta kesilib, ishtirokchilar yangi sport kompleksining faoliyati bilan yaqindan tanishdilar.
Ko‘tarinki ruhda tashkil etilgan bayram kechasida viloyat hokimi Shavkatjon Abdurazzoqov so‘zga chiqib, yoshlar bayrami bilan yig‘ilganlarni qutlagan holda mamlakatimizda yoshlar uchun yaratilayotgan imkoniyatlar, Prezident tashabbuslari va davlat siyosatida yosh avlodga qaratilayotgan e’tibor haqida to‘xtalib o‘tdi.
“Dolzarb 90 kun” dasturi doirasida viloyatda madaniy-ma’rifiy, sport tadbirlari davom etishi ta’kidlandi. Namanganda ham iqtidorli, iste’dodli yoshlar ko‘pligi, chet tillarini biladigan, kitob o‘qiydigan yoshlarni ko‘paytirish zamon talabi ekanligi qayd etildi. Maydonga o‘rnatilgan monitor orqali Prezident Shavkat Mirziyoyevning yoshlar bilan muloqotida ta’kidlagan o‘g‘il-qizlarni yangi marralarga chorlovchi da’vatlarini ifodalagan videorolik namoyish etildi.
Festival davomida yoshlar siyosatini amalga oshirishda o‘rnak bo‘lgan soha vakillari, mahalladagi yoshlar yetakchilari hamda faol yoshlar tashkilotchilar tomonidan munosib taqdirlanishdi.
Gala konsertda estradamiz yorqin yulduzi Jaloliddin Ahmadaliyev tomonidan kuylangan sho‘x va diltorlar qo‘shiqlar yig‘ilganlarga qaynoq kayfiyat bag‘ishladi.