Dedabayev Akram Gapparovich Namangan viloyati sport boshqarmasi boshligʻi lavozimiga tayinlandi.
2025-04-07 20:20:00 / Yangiliklar
Akram Dedabayev 1978-yilda Namangan shahrida tugʻilgan. Maʼlumoti oliy. 2000-yilda Namangan davlat universitetining kunduzgi taʼlim shakli, 2006-yilda esa mazkur universitetning sirtqi taʼlim shaklini tamomlagan. Mutaxassisligi — jismoniy tarbiya oʻqituvchisi va yurisprudensiya sohasi mutaxassisi.
Mehnat faoliyatini 1995-yilda Namangan shahri xalq taʼlimiga qarashli 2-bolalar va oʻsmirlar sport maktabida boshlagan. Oʻtgan yillar davomida Namangan viloyati oliy sport mahorati maktabi murabbiyi, mazkur maktab direktori, boks boʻyicha murabbiy, shuningdek, Namangan olimpiya zaxiralari kolleji direktori, Namangan viloyati jismoniy tarbiya va sport boshqarmasi boshligʻi, “Navbahor lochinlari” professional futbol klubi direktori kabi lavozimlarda faoliyat yuritgan.
Tayinlovga qadar Namangan viloyati olimpiya va paralimpiya sport turlariga tayyorlash markazi direktori lavozimida ishlab kelayotgan edi.
Mazkur tayinlov Oʻzbekiston Respublikasi sport vazirining tegishli buyrugʻi asosida amalga oshirildi.