Namangan vilоyati hоkimligi

Jumladan, Chortoq, Kosonsoy, Chust, Pop va Yangiqo‘rg‘on tumanlarida aholi va sayyohlar uchun barcha qulayliklarga ega turizm maskanlarini tashkil etish bo‘yicha master-rejalar ishlab chiqilmoqda. 
 
 Mazkur loyihalarni muhokama qilish maqsadida Namangan viloyati hokimining qurilish masalalari bo‘yicha o‘rinbosari G‘ofurjon Jamolov rahbarligida yig‘ilish o‘tkazildi. 
 
 Yig‘ilishda viloyati hokimining o‘rinbosari Botirjon Nuritdinov, Namangan shahar hokimi Anvarjon Otaxodjayev hamda Chortoq tumani hokimi Ilxomjon Sattarov, shuningdek tegishli boshqarma va tashkilotlar rahbarlari ishtirok etdilar. 
 
 Yig‘ilishda Kosonsoy tumani “Olmazor” massivida, Yangiqo‘rg‘on tumani “Qayroqi” MFY hududida, Chortoq tumani Chortoqsoy qirg‘oq bo‘yi hududida, Chust tumani Rezaksoy suv ombori hududida hamda Pop tumani Chodak hududida amalga oshiriladigan turizm yo‘nalishidagi master rejalar muhokama qilindi. Shu bilan birgalikda mazkur tumanlarda hududlarning o‘ziga xos xususiyatlaridan kelib chiqib, Toshkent viloyati Bo‘stonliq tumanida ishga tushirilayotgan loyihalarga o‘xshash aholi dam olish maskanlari va turistik majmualarni tashkil etish bo‘yicha takliflar tayyorlash vazifasi yuklatildi. 
 
 Shu bilan birgalikda Chortoq tumanida 10 ta sanatoriy va mehmonxonalar qurish bo‘yicha Rossiya va Xitoylik investorlarni jalb qilish ishlari muhokama qilinib, tegishli mutasaddilarga topshiriqlar berildi. 
 
 Bundan tashqari, yuqoridagi tumanlarning har biriga kamida 50 mln.dollardan investitsiyalarni jalb qilish "paketi"ni shakllantirib, tarmoq jadvallarini ishlab chiqish, Namangan shahrida 24/7 turizm ko‘chasi hamda viloyatning har bir tumanida kamida 1 tadan gastro va xizmat ko‘rsatish ko‘chalari tashkil etish bo‘yicha topshiriqlar berildi. 
 Ushbu loyihalar Namangan viloyatida turizmni rivojlantirish va aholi bandligini oshirishga xizmat qiladi. 
 
 Namangan viloyati hokimligi Axborot xizmati.