Namangan vilоyati hоkimligi

Assalomu alaykum!

Hurmatli marosim ishtirokchilari!

Bugun biz mamlakatimiz Bosh qomusi – Oʻzbekiston Respublikasi Konstitutsiyasi qabul qilinganligining 32 yilligini keng nishonlash arafasida turibmiz.

Oʻtgan davr mobaynida Davlatimiz mustaqilligini mustahkamlashning huquqiy poydevori boʻlib xizmat qilgan Bosh qomusimiz hurmatli Prezidentimizning tashabbuslari bilan davr talabiga muvofiq takomillashtirildi. Zero, jamiyatimiz bugun taraqqiyotning yangi bosqichiga koʻtarildiki, bu Bosh qomusimizni tubdan isloh qilishni taqozo qildi.

Ushbu zaruriyat samarasi oʻlaroq, 2023-yil 30-aprelda boʻlib oʻtgan Referendumda xalqimiz bu siyosiy voqealikka faol fuqarolik pozitsiyasini namoyon etib, Oʻzbekiston Respublikasining Konstitutsiyasi yangi tahrirda qabul qilingan edi.

Hurmatli Yurtboshimiz eʼtiroflari bilan aytganda, joriy yilning 27-oktyabr kuni mamlakatimizda Parlament hamda mahalliy Kengashlarga oʻtkazilgan saylov yangilangan Konstitutsiyamizga muvofiq oʻtkazilgan ilk saylov sifatida tarixga kirdi.

Yangilangan Konstitutsiyada Oʻzbekiston huquqiy, ijtimoiy, dunyoviy demokratik davlat ekanligi va kiritilgan oʻzgartish va qoʻshimchalar avvalo “inson qadri uchun” degan tamoyilga asoslanganligi bilan avvalgi tahrirdagi Konstitutsiyaga nisbatan muhim ijtimoiy-siyosiy ahamiyat kasb etdi.

Yangilangan Konstitutsiyamizda ilgari amal qilib kelgan “davlat–jamiyat–inson” tamoyili “inson–jamiyat–davlat” deb oʻzgartirilib, eng avvalo inson manfaati har narsadan ustuvorligi qatʼiy belgilab qoʻyildi.

Yangi qabul qilingan Konstitutsiyamizda Oʻzbekiston ijtimoiy davlat deb eʼlon qilingani davlatning ijtimoiy sohadagi majburiyatlari bilan bogʻliq Konstitutsiyadagi normalar 3 barobar, aholi salomatligini asrash bilan bogʻliq normalar 4 barobar koʻpaytirildi.

Taʼlim va ilm-fanga oid normalar qariyb 2 barobarga oshirildi.

Konstitutsiyada Oʻzbekiston – huquqiy davlat, deb belgilandi. Unda inson huquqlariga oid normalar 3 baravar oshirildi.

Shu bilan birga, milliy iqtisodiyot va tadbirkorlikni rivojlantirish, mamlakatimizda investitsiyaviy muhitni yaxshilash hamda mulk himoyasini yanada kuchaytirishga qaratilgan normalar bilan boyitildi.

Ochiqlik siyosatini davom ettirish, faol fuqarolik jamiyatini shakllantirish va jamoatchilik nazorati institutini yanada rivojlantirish huquqiy jihatdan mustahkamlab qoʻyildi.

Shuningdek, bugungi kunning eng dolzarb muammolardan biri – ekologiya,  davlat boshqaruvi tizimini modernizatsiya qilish va bugungi kun talablariga moslashtirish masalalariga alohida oʻrin berildi.

Jumladan,

Taʼlim, ilm-fan va ijtimoiy himoya sohalarda fuqarolar manfaatlari, imtiyoz va kafolatlar kuchaytirildi. 

Bosh qomusimizda oila, bolalar va yoshlar, ota-onalar masalalariga alohida eʼtibor qaratildi.

Davlat byudjetini shakllantirish va uni ijro etish ustidan jamoatchilik nazoratini oʻrnatish belgilandi.

Konstitutsiyamizning yuqoridagi va boshqa koʻplab moddalari bilan belgilangan kafolatlar viloyatimizda ham iqtisodiy, ijtimoiy rivojlantirish borasida amalga oshirilayotgan keng koʻlamli ishlarda namoyon boʻlmoqda.   

Hurmatli Prezidentimiz tomonidan iqtisodiyot tarmoqlarini qoʻllab-quvvatlash borasida olib borilayotgan oqilona siyosatlari natijasida soʻnggi besh yilda viloyatda yalpi hududiy mahsulot hajmi 2,0 barobarga oshdi.

Aholi jon boshiga mahsulot ishlab chiqarish koʻrsatkichi 11,5 mln.soʻmdan

21,5 mln.soʻmga yetkazildi. Tadbirkorlik subyektlari soni 18 mingtadan

37 mingtaga, bunda yirik subyektlar

65 tadan 139 taga koʻpaydi.

Aziz doʻstlar!

Bugungi kunda oldimizga quyilgan eng muhim masala – bu aholi daromadini oshirish orqali kambagʻallikni, ishsizlikni va migratsiyasini qisqartirishdir. 2022-yilda viloyatimizda 104,5 ming nafar kambagʻal oilalar mavjud boʻlib, kambagʻallik darajasi 15,7 foizni tashkil etgan edi.

Mahallaga tushib, har bir oilalar bilan alohida individual ishlab, ularning daromadlarini oshirish orqali kambagʻal oilalar sonini 48,5 ming nafarga yoki kambagʻallik darajasini

7,8 foizga tushirildi.

Soʻngi besh yilda 175 ming nafar mehnatga layoqatli yoshlarimiz ilk bora mehnat bozoriga kirib keldi.

Amalga oshirilgan ishlar hisobiga ishsizlik darajasini 2020-yildagi

10,6 foizdan 2024-yil yakuni bilan

5,2 foizga, ishsizlar sonini 110 ming nafardan 51,2 ming nafarga tushirish kutilmoqda.

Viloyatimizning investitsion jozibadorligi va eksport salohiyatini oshirish borasida ham bir qator ijobiy ishlar amalga oshirildi. 2020-yil jami 364,9 mln. dollar xorijiy investitsiya oʻzlashtirilgan boʻlsa, 2024-yil 9 oyi yakuni bilan 1,6 mlrd. dollar toʻgʻridan-toʻgʻri xorijiy investitsiyalar jalb etildi. Joriy yil yakuni bilan qoʻshimcha zaxiralarni ishga solgan holda 3 mlrd. dollar xorijiy investitsiyalar oʻzlashtiriladi.

Bugun shuni mamnuniyat bilan taʼkidlamoqchiman: aholi bandligini taʼminlash, ishsizlikni qisqartirish, tadbirkorlikni qoʻllab-quvvatlash maqsadida tashkil qilingan kichik sanoat zonalari “Namangan tajribasi” sifatida toʻliq oʻzini oqlamoqda.

Oʻz navbatida aholiga munosib turmush sharoitlari yaratish boʻyicha infratuzilmani rivojlantirishga alohida ahamiyat qaratildi.

Hududlarda mahalla infratuzilmasini yaxshilash maqsadida 7 160 ta obyektda qurilish-taʼmirlash va jihozlash ishlariga 8,6 trln soʻm yoʻnaltirildi.

Aholini markazlashgan ichimlik suvi bilan taʼminlash darajasi 66,5 foizdan 84,9 foizga yetkazildi.

Uy-joy taʼminoti sohasida 14 721 ta xonadondan iborat 404 ta koʻp qavatli uy-joylar barpo etildi.

Ijtimoiy sohani rivojlantirish borasida viloyatda jami 103 ta maktabgacha taʼlim muassasasi taʼmirlandi, 33 ta yangi qurildi hamda 2514 ta yangi nodavlat maktabgacha taʼlim muassasalari tashkil etildi.

Hurmatli tadbir ishtirokchilari!

Sohibqiron Amir Temur bobomiz “Davlat qonunlar asosida qurilmas ekan, unday saltanatning shukuhi, qudrati va tarkibi yoʻqoladi”, deb taʼkidlagan edilar.

Konstitutsiyamizni qabul qilish jarayonida xalqimiz bilan har tomonlama maslahatlashgan holda, yurtimiz va jahondagi ilgʻor tajribalarni chuqur oʻrganib, xalqchil qabul qilinganini bugun jahon hamjamiyati keng eʼtirof etib kelmoqda.

Shu bilan birga, hurmatli Prezidentimiz tashabbuslari bilan aynan Konstitutsiyamizga tayanib, Yangi Oʻzbekistonni barpo etish boʻyicha keng koʻlamli islohotlarni amalga oshirish maqsadida, mamlakatimizda “Oʻzbekiston – 2030” strategiyasi qabul qilingani, bejiz emas.

Buning natijasida, oʻtgan qisqa davrda jamiyatimizning siyosiy-huquqiy, ijtimoiy-iqtisodiy va  madaniy-maʼrifiy manzarasi tubdan oʻzgardi. Erkinlik va ochiqlik, qonun ustuvorligi, jahon hamjamiyati bilan oʻzaro manfaatli hamkorlik davlatimiz siyosatining asosiy yoʻnalishiga aylandi.

Eng muhimi, bunday oʻzgarishlarni har bir inson kundalik hayotida koʻrmoqda, his etmoqda. Ayniqsa, Oʻzbekiston fuqarolarining huquq va erkinliklarini chet ellarda ham taʼminlash boʻyicha boshlangan ishlarimiz xorijda yashayotgan yurtdoshlarimizning Vatanimizga boʻlgan mehri va ishonchini oshirishga xizmat qilmoqda.

Har qanday demokratik islohotlar samarasi, tinchlik va taraqqiyotning asosiy garovi ham Konstitutsiya va qonun ustuvorligini taʼminlanishi bilan bevosita bogʻliq.

Shu boisdan, qabul qilinayotgan har bir huquqiy hujjat ham Konstitutsiyamizda belgilangan normalar asosida ishlab chiqiladi va amaliyotga tadbiq etiladi.

Konstitutsiyamiz asosida qabul qilinayotgan qarorlarimiz xalqimiz ogʻirini yengil qilishda, umuman olganda, inson qadr-qimmatini yuksak pogʻonaga chiqarishda muhim qadamlar qoʻyilishiga omil boʻlmoqda.

“Islohot – islohot uchun emas, inson uchun” tamoyili “Inson qadri” degan yuksak tushuncha bilan yanada kuchaytirildi.

Binobarin, oʻz xalqining xohish-irodasi, dili va tilidagi ezgu niyatlariga hamohang Konstitutsiyaga ega boʻlgan mamlakat oʻzi belgilagan yuksak marralardan hech qachon ogʻishmasdan, doimo oldinga qarab boradi.

Sizlarni, butun xalqimizni qutlugʻ ayyom – Konstitutsiyamizning 32 yilligi bilan yana bir bor chin qalbimdan samimiy muborakbod etaman.

Eʼtiboringiz uchun rahmat.