Axsikent arxeologiya parki Shayx Faysal bin Qosim Al Tani muzeyi bilan hamkorlik oʻrnatdi
2024-12-09 17:55:00 / Yangiliklar
U oʻzaro tajriba almashish, manbashunoslik boʻyicha amaliy hamkorlik, arxeologlarga artefaktlardan ilmiy ishlarda foydalanish imkoniyatini beradi.
Muzey rahbari Faysal Haddad Axsikent arxeologiya parki direktori Anvar Ikrom boshchiligidagi Namangan viloyati delegatsiyasini quvonch bilan kutib oldi.
- Oʻzbekiston buyuk tarix maskani. Mamlakatlarimiz oʻrtasidagi munosabatlar yangi darajaga chiqmoqda. Bu har jabhada sezilmoqda. Sizning elchingiz Ashraf Xodjayev bilan juda yaqin munosabatdamiz. Axsikent arxeologiya parki va bizning muzeyimiz oʻrtasidagi hamkorlik bardavom boʻlajak, - deydi janob Haddad.
Qatarning Al-Shahaniya munitsipalitetida joylashgan, 530 gektar maydonni oʻz ichiga olgan dunyodagi eng boy kolleksiyaga ega dargoh 1998-yilda Shayx Faysal bin Qosim al Tani tomonidan tashkil etilgan. U Dohadan 20 km gʻarbda Al Samriyadagi tarixiy qalʼa ustiga qurilgan.
Muzeyda Oʻzbekiston tarixiga oid koʻplab artefaktlar saqlanmoqda. Axsikentda yasalgan Damashq qilichlari, Somoniylar, Qoraxoniylar va Temuriylar davriga oid Axsikent kulolchiligi namunalari, kandakorlik, misgarlik mahsulotlari orasida Buxoro ustalari tomonidan yasalgan oftoba va suv idishlarini shular jumlasidandir.
Shuningdek, muzeyda namanganlik hunarmandlar tomonidan 220 kg oltin, 660 kg kumushdan foydalangan holda tayyorlangan Kaʼbapoʻsh, Abu Ali Ibn Sinoning “Tib qonunlari” asarining 1478-yilda koʻchirilgan noyob nusʼhasi saqlanmoqda.
Tashrif davomida Oʻzbekiston tarixi telekanali jurnalisti, manbashunos olima Dildora Hasanova maxsus koʻrsatuv tasvirga oldi. OʻzA fotomuxbiri, Axsikent arxeologiya parki Bosh muhofizi Xotam Mamadaliyev esa eng nodir tasvirlarni tarixga muhrladi.
Uchrashuv soʻnggida muzeyga “Axsikent arxeologiya parki” kitobi taqdim etildi.
Media Departament