Namanganda qurilish ishlari nazorat ostida
2024-11-14 16:15:00 / Yangiliklar
Namangan viloyati hokimining oʻrinbosari Gʻofurjon Djamalov boshchiligidagi ishchi guruh Namangan shahridagi Uychi koʻchasida olib borilayotgan qurilish ishlarini oʻrgandi.
Bu koʻchada qurilayotgan koʻp qavatli turar-joy binolari shahar aholisining talabini qondirish uchun moʻljallangan boʻlib, mahalliy infratuzilmani rivojlantirishga hissa qoʻshadi.
Ishchi guruh tomonidan qurilish ishlarining belgilangan tartib va qoidalar asosida amalga oshirilayotganligi tekshirildi. Uychi koʻchasida qad rostlayotgan binolar qurilish standartlari va sifat talablariga qanchalik muvofiqligi baholandi.
Oʻrganish davomida aniqlangan ayrim kamchiliklar boʻyicha qurilish ishlarini amalga oshirayotgan mutaxassislar va masʼul rahbarlarga aniq topshiriqlar berildi. Ulardan ish jarayonidagi mavjud kamchiliklarni tezda bartaraf etish belgilandi.
Namangan viloyati Qurilish va uy-joy kommunal xoʻjaligi bosh boshqarmasi axborot xizmati.