Xirmonga baraka: Namangan viloyatining labzi halol paxtakorlari rejani ortig‘i bilan bajardilar!
2026-10-18 06:05:00 / Yangiliklar
E’tiborga molik tomoni, bu yil reja qisqa fursatda - mamlakatimizda peshqadamlar safida, vodiyda esa birinchilardan bo‘lib bajarildi.
Ta’kidlash joiz, yig‘im-terim mavsumida Chortoq tumani Respublikamizda birinchilardan bo‘ldi. Shundan so‘ng, katta karvon To‘raqo‘rg‘on, Uychi, Namangan, Uchqo‘rg‘on, Chust, Norin, Mingbuloq tumanlari ham birin-ketin g‘alaba marrasini zabt etdilar.
Joriy yilda viloyat bo‘yicha 48 ming 800 gektar maydonga chigit ekilib, ekinlar agrotexnik talablar asosida parvarishlandi. Qabul punktlariga har gektardan o‘rtacha 52,2 sentnerdan oshirib, jami 254 ming 500 tonnadan ziyod sifatli sanoat xomashyosi yetkazib berildi.
Quvonarli tomoni, bu yil dalalarda paxtadan olinayotgan hosildorlik keskin oshdi. Dastlabki tahlillarga ko‘ra, viloyatdagi bir qator ilg‘or fermer xo‘jaliklari yuqori natijaga erishmoqda. Masalan, To‘raqo‘rg‘on tumanidagi «Tursunboy Komilov», «Baxtiyor Ne’mat Shavkat», Uchqo‘rg‘on tumanidagi «Toshpo‘lat hoji», Uychi tumanidagi «Zamin» xo‘jaliklarida 90 sentnerdan oshirib xirmon ko‘tarildi.
Tabiiyki, bu natijalar zamirida asosiy maydonlarga Shinjon texnologiyasi asosida xorijning sifatli sara urug‘i ekilgani, g‘o‘zaga zamonaviy texnologiyalar asosida ishlov berilgani, bir so‘z bilan aytganda, sohaga ilm-fan, bilim va tajriba bilan yondashilgani turibdi.
Zero, qishloq xo‘jaligida ilm-fan yutuqlarini amaliyotga tatbiq etish hosildorlikni oshirish uchun yangi imkoniyatlar yaratmoqda. Ekish sxemalarini takomillashtirish, ko‘chatlar sonini maqbullashtirish va agrotexnik tadbirlarni o‘z vaqtida o‘tkazish yer imkoniyatlaridan samarali foydalanishga xizmat qilmoqda.
Zamonaviy texnologiyalar suv va mehnat resurslarini tejash, ish jarayonlarini tezlashtirish hamda hosilni o‘z vaqtida yig‘ib olishda muhim ahamiyat kasb etmoqda. Ayniqsa, paxta terimining mexanizatsiyalashtirilishi inson mehnatiga bo‘lgan ehtiyojni kamaytirish bilan birga, terim sur’atini oshirish imkonini bermoqda.
Bugungi kunda viloyatda 189 ta paxta terish mashinasi mavjud bo‘lib, 48,8 ming gektar paxta maydonining 37,8 ming gektaridagi hosil terim agregatlari yordamida terib olindi. Bu paxtachilikda zamonaviy texnika imkoniyatlaridan samarali foydalanish ko‘lami kengayib borayotganini ko‘rsatadi.
E’tiborlisi, yetishtirilgan paxta tolasi mahalliy to‘qimachilik klasterlarida qayta ishlanib, ip-kalava va gazlama mahsulotlariga aylantirilmoqda. Bu esa xomashyodan tayyor mahsulotgacha bo‘lgan qo‘shimcha qiymat zanjirini rivojlantirib, viloyat iqtisodiyotiga munosib hissa qo‘shmoqda.
Paxtachilikda erishilgan ushbu yuqori natija faqat joriy mavsum bilan cheklanmaydi. Paxtadan bo‘shagan maydonlarga ochiq usulda g‘alla ekish ishlarini o‘z vaqtida tashkil etish yerdan yil davomida samarali foydalanish va keyingi hosil uchun mustahkam zamin yaratishga xizmat qiladi.
Mo‘l hosil, halol mehnat va g‘alaba nashidasi — Namangan paxtakorlarining zafarli mehnati samarasidir!
YANA BIR BOR G‘ALABA MUBORAK, AZIZ YURTDOSHLAR!