Namangan vilоyati hоkimligi

Saylov jarayonlarining oshkora va haqqoniy tarzda oʻtishini taʼminlashda kuzatuvchilarning ishtiroki juda muhim. Ular saylov kampaniyasi boshlanganidan to yakuniy natijalar eʼlon qilingunga qadar ishtirok etadilar. Ularning ishtiroki jarayonlarda oshkoralik muhiti yaratilishiga xizmat qiladi, shuningdek, fuqarolarning saylovlarga ishonchini orttirib, faol ishtirok etishini taʼminlaydi.

Bugun  Namangan viloyati hududiy saylov komissiyasiga Yevropada xavfsizlik va hamkorlik tashkiloti Demokratik institutlar va inson huquqlari boʻyicha byurosi (DIIHB) kuzatuvchilari tashrif buyurdi.
YEXHT missiyasining kuzatuvchilari - Germaniya davlatidan Kati Xyotger hamda Buyuk Britaniyadan Martin Bruks viloyat hududiy saylov komissiyasi faoliyati bilan yaqindan tanishdi.

Hududiy saylov komissiyasi raisi Sobitxon Turgʻunov YEXHT missiyasi vakillari bilan olib borgan muloqotlari chogʻida joriy yil 27-oktyabrda mamlakatimizda boʻlib oʻtadigan Oʻzbekiston Respublikasi Oliy Majlisi Qonunchilik palatasi va xalq deputatlari Kengashlari deputatlari saylovlari aralash saylov tizimi asosida oʻtkazilishi va uning oʻziga xos xususiyatlari, milliy saylov amaliyotiga tatbiq etilgan yangiliklardan yana biri “E-Saylov” axborot tizimi va mazkur tizimning afzalliklari yuzasidan batafsil maʼlumot berib oʻtdi.

Xususan, saylovi kampaniyasi tobora qizgʻin pallaga kirib borayotgani, bu masʼuliyatli jarayon Saylov kodeksida belgilangan tartiblarga binoan izchillik bilan muvofiqlashtirib borilayotganligi taʼkidlandi.

Oʻz navbatida, HSK raisi xalqaro kuzatuvchilarga saylovga tayyorgarlik koʻrish va uni oʻtkazish boʻyicha amalga oshirilayotgan ishlarda oshkoralikni taʼminlash maqsadida tadbirlarning tartibi, bosqichlari va muddatlari haqidagi axborotlar eng avvalo, saylovchilarga hamda siyosiy partiyalarga Markaziy saylov komissiyasi hamda hududiy saylov komissiyasining rasmiy veb-saytlari va boshqa ommaviy axborot vositalari orqali tezkorlik bilan yetkazilayotganini maʼlum qildi.

Olib borilgan muloqotlar konstruktiv va samimiy tarzda oʻtdi, hududiy saylov komissiyasi raisi bundan keyin ham bu kabi muloqotlarga doim tayyor va ochiq ekanligini bildirib oʻtdi.

📍Namangan viloyat hududiy saylov komissiyasi matbuot markazi