Namangan viloyati va Sonnam shahri o‘rtasida hamkorlik aloqalari kengaymoqda
2026-09-10 20:00:00 / Yangiliklar
Sonnam — Janubiy Koreyaning Kyongido provinsiyasida, Seulga juda yaqin joylashgan yirik shahar. Maydoni taxminan 141,7 km², aholisi 900 mingdan ortiq. Sun’iy intellekt, yarimo‘tkazgichlar, raqamli texnologiyalar va startap ekotizimi Sonnam iqtisodiyotining muhim yo‘nalishlaridir.
Uchrashuvda O‘zbekiston va Koreya Respublikasi o‘rtasidagi strategik sheriklikni hududlar miqyosida rivojlantirish masalalari muhokama qilindi.
Muzokaralar natijasida tomonlar yuqori texnologiyali va innovatsion mahsulotlar ishlab chiqarish bo‘yicha qo‘shma loyihalarni amalga oshirish, Sonnamning shaharsozlik va ekologiyani boshqarishdagi ilg‘or tajribasini Namanganda tatbiq etish, zamonaviy IT parklar yaratish, startaplarni qo‘llab-quvvatlash va tajriba almashish kabi yo‘nalishlarda hamkorlik qilishga kelishib oldilar.
Shuningdek, muzokaralar davomida Namangan viloyatining sanoat salohiyati hamda xorijiy investorlar uchun yaratilgan qulay shart-sharoitlar haqida batafsil ma’lumot berildi.
Uchrashuv yakunida Sonnam shahri meri va ishbilarmonlari Namanganga, xususan, 66-Xalqaro “Gullar festivali”ga taklif qilindilar.