Namangan vilоyati hоkimligi

Muloqotda, avvalo, qurilish sohasida tadbirkorlik subyektlari duch kelayotgan muammolar, investitsiya loyihalarini amalga oshirish jarayonidagi ayrim to‘siqlar, hujjatlarni rasmiylashtirish, loyihalarni kelishish va qurilish ishlarini o‘z vaqtida boshlash bilan bog‘liq masalalar atroflicha ko‘rib chiqildi.

Viloyat rahbari qurilish sohasida ortiqcha byurokratik to‘siqlarga mutlaqo yo‘l qo‘yilmasligi, tadbirkor va investorlarning vaqtini oladigan sun’iy to‘siqlarni bartaraf etish zarurligini ta’kidladi.

— Tadbirkorning ishini ortiqcha qog‘ozbozlik va byurokratiya bilan qiyinlashtirishga yo‘l qo‘ymaymiz. Har bir loyihaning o‘z vaqtida ishga tushishi, yangi ish o‘rinlari yaratilishi va investitsiyalar samarali o‘zlashtirilishi uchun barcha imkoniyatlarni yaratamiz, — dedi viloyat hokimi.

Uchrashuvda renovatsiya jarayonlarini yanada jadallashtirish, aholi uchun zamonaviy va qulay ko‘p qavatli uy-joylar barpo etish, shahar va tumanlarda qurilish ishlarini belgilangan muddatlarda amalga oshirish masalalariga ham alohida e’tibor qaratildi.

Shuningdek, ko‘p qavatli uy-joylar, ijtimoiy soha obyektlari hamda davlat buyurtmasi asosidagi qurilishlarni sifatli va qisqa muddatlarda yakunlash bo‘yicha mas’ullarga aniq vazifalar belgilab berildi.

Loyihalarni amalga oshirishda hujjatlarning to‘liq va sifatli rasmiylashtirilishi muhimligi qayd etildi. Bu borada tadbirkor va qurilish tashkilotlariga zarur amaliy yordam ko‘rsatish maqsadida mas’ul xodimlar biriktirilishi belgilandi.

Uchrashuv davomida qurilish tashkilotlari rahbarlari o‘zlarini qiziqtirayotgan masalalar, xususan, maxsus texnika vositalarining qurilish materiallari va yuklar bilan harakatlanishi, loyihalarni amalga oshirish jarayonida yuzaga kelayotgan tashkiliy masalalar yuzasidan murojaatlarini bildirdi.

Viloyat hokimi mazkur masalalarni amaldagi qonunchilik doirasida hal etish bo‘yicha zarur ko‘mak ko‘rsatilishini, tadbirkorlarning faoliyatiga qonuniy va amaliy jihatdan sharoit yaratib berish muhim vazifa ekanini ta’kidladi.

Ayniqsa, respublika darajasida hal etilishi lozim bo‘lgan masalalar bo‘yicha viloyat rahbari shaxsan ko‘maklashishi va tegishli tashkilotlar bilan birgalikda ularning yechimini ta’minlashini bildirdi.

Uchrashuvda har bir murojaat va taklif alohida ko‘rib chiqilib, ular bo‘yicha mas’ullar belgilandi. Maqsad — qurilish sohasidagi ishlarni tezlashtirish, investitsiya loyihalarini o‘z vaqtida ishga tushirish, zamonaviy uy-joylar va ijtimoiy obyektlarni sifatli barpo etish hamda tadbirkorlar uchun yanada qulay ishbilarmonlik muhitini yaratish.

Viloyatda qurilish sur’atlarini oshirish bilan bir qatorda, obyektlarning sifati, shaharsozlik talablariga rioya etilishi va aholi uchun qulay infratuzilma yaratilishi doimiy nazoratda bo‘lishi belgilandi.

Uchrashuv yakunida mas’ullarga har bir loyiha bo‘yicha belgilangan vazifalarni o‘z vaqtida va sifatli bajarish, tadbirkorlarning qonuniy manfaatlarini himoya qilish hamda murojaatlarni sansalorlikka solmasdan, amaliy natija bilan hal etish yuzasidan qat’iy ko‘rsatmalar berildi.

Davlatobod tumani hokimligi
Axborot xizmati