Namangan viloyati hokimi Shavkatjon Abdurazzoqov boshchiligidagi ishchi guruhi Uychi tumanida bo‘lib, qishloq xo‘jaligi sohasida amalga oshirilayotgan ishlar, paxta yig‘im-terimiga tayyorgarlik jarayonlari bilan yaqindan tanishmoqda.
2026-08-30 15:45:00 / Yangiliklar
Paxta terimini uyushqoqlik bilan tashkil etish maqsadida 16 ta paxta terish mashinasi jalb qilinib, ular asosida 16 ta terim otryadi shakllantirildi. Mazkur otryadlar tomonidan hosilni qisqa muddatlarda, sifatli va nobudgarchilikka yo‘l qo‘ymagan holda yig‘ib-terib olish choralari ko‘rilmoqda.
Shuningdek, paxta dalalarida pishib yetilgan ko‘saklarning ochilishini tezlashtirish maqsadida defoliatsiya ishlari, jumladan, etafon bilan ishlov berish jarayonlari amalga oshirilmoqda.
Mutaxassislar tomonidan agrotexnik tadbirlarga rioya etilgan holda olib borilayotgan ishlar natijasida paxta hosilini sifatli saqlab qolish va har bir gektardan yuqori samaradorlikka erishish maqsad qilingan.
Viloyat rahbari va soha mutaxassislari “Odil oq oltin”, “Umirzoqov Jahongir”, “Olmurut mirishkori”, “Abduxalil ota o‘g‘li Anvar” fermer xo‘jaliklari dalalarida bo‘lib, agrotexnik tadbirlarni sifatli o‘tkazish va paxta terimiga tayyorgarlik bo‘yicha tavsiya hamda ko‘rsatmalar berdi.
Uychi tumani hokimligi
Axborot xizmati