Namangan vilоyati hоkimligi

Assalomu alaykum,

Aziz yurtdoshlar !

Muhtaram mehmonlar !

Avvalo, Sizlarni va Sizlar orqali barcha namanganliklarni eng ulugʻ, eng aziz bayramimiz – Oʻzbekiston Respublikasi Davlat mustaqilligining 33 yilligi bilan samimiy tabriklayman: bayram barchamizga muborak boʻlsin!

(Pauza. Qarsaklar)

Mamlakatimizda kechayotgan keng koʻlamli yangilanishlar jarayonining amaliy natijasida bugungi kunda aholi farovonligi va yurtimiz taraqqiyotida katta oʻzgarishlar sodir boʻlmoqda.

Mana shunday islohotlar jarayonida faol ishtirok etayotgan Namangan va namanganliklar ham qutlugʻ ayyomni yanada obod holda, oʻziga xos yutuqlar bilan qarshi olmoqda.

Foydalanishga topshirilayotgan yuzlab yangi ob'ektlar misolida buni yaqqol koʻrish mumkin.

Toʻyga toʻyona bilan deganlaridek, mustaqillik bayrami arafasida el xizmatini boshlayotgan ob'ektlar salmogʻi koʻpligi ham fikrimiz dalilidir.

Bugun koʻrkamligi bilan Sizlarni oʻziga maftun qilayotgan “Yangi Oʻzbekiston bogʻi” shulardan biri.

Ushbu majmua betakror manzarasi, yozgi amfiteatr, dam olish maskanlari, bolalar maydonchalari, sun'iy koʻl,  "Vatanparvarlik bogʻi", xizmat koʻrsatish shoxobchalari bilan xalqimizning eng sevimli maskanlaridan biriga aylanishi shubhasiz. 

Kuni kecha viloyat markazida xorijdan keltirilgan 36 dona eng zamonaviy avtobuslar harakatini yoʻlga qoʻyganimiz esa bayramga munosib tuhfa boʻlgani yurtdoshlarimiz quvonchida oʻz aksini topmoqda.

Hurmatli tadbir ishtirokchilari!

Muhtaram Prezidentimizning Farmonlariga asosan el-yurt taraqqiyotiga munosib hissa qoʻshayotgan fidoyi insonlar Davlatimizning yuksak unvonlari, orden va medallari bilan mukofotlanmoqdalar.

Ular orasida viloyatimiz vakillari ham koʻpligi bizni quvontiradi.

Xususan, joriy yil boshidan bugungi kunga qadar Namangan viloyatimizda yashab, mehnat qilayotgan 25 nafar yurtdoshimiz shunday yuksak e'tirofga sazovor boʻldilar.

Ular orasida «Oʻzbekiston Respublikasida xizmat koʻrsatgan paxtakor» faxriy unvoniga munosib  koʻrilgan Mingbuloq tumanidagi «Baxtiyor Abdusalomovich» fermer xoʻjaligi boshligʻi Qodirov Baxtiyor Abdusalomovich,

«Doʻstlik» ordeni sohibi:

Toʻraqoʻrgʻon tumanidagi «4-qishloq qurilish kombinati» mas'uliyati cheklangan jamiyati kuzatuv kengashi raisi, Fozilov Ahmadjon Turgʻunbaevich,

«Mehnat shuhrati» ordeni sohibi: Davlatobod tumanidagi 81-umumiy oʻrta ta'lim maktabining tarix fani oʻqituvchisi Abdualimov Aloxon,

“Shuhrat” medali bilan taqdirlangan Uychi tumani hokimi  Musaev Shuhrat Mirsodiqovich,

Namangan tumanidagi «Nam Motor Servis» mas'uliyati cheklangan jamiyati rahbari Bekmirzaev Baxtiyor Sodiqjonovich va yana koʻplab boshqa faollarimiz bor.

Fursatdan foydalanib, ularning barchasiga yana bir bor Davlatimizning yuksak unvonlari, orden va medallari muborak boʻlsin deymiz.

Qadrli hamyurtlar! 

Har yili Mustaqillik bayrami arafasida amalga oshirilayotgan ishlarni sarhisob qilish, kelgusi rejalar haqida xalqimizni xabardor etish ezgu an'anaga aylangan. Bugun ortga bir nazar tashlab, hozirgacha bajarilgan ishlarni tahlil qilsak, yaqin kelajak uchun rejalashtirilgan ustivor vazifalarni yana bir bor aniqlashtirib olsak.

Shu oʻrinda yaqin yillar ichidagi oʻzgarishlarni koʻz oldingizga keltirishingiz uchun e'tiboringizni ayrim raqamlarga qaratmoqchiman.

Eng avvalo, viloyat salohiyatini belgilaydigan koʻrsatkich – yalpi hududiy mahsulot ishlab chiqarish hajmini olib koʻraylik.

2017 yilda 17.8 trln. soʻmni tashkil etgan bu raqam oʻtgan yil yakuniga kelib 3.2 barobarga ortdi.

Ayniqsa, oʻtgan etti yilda investisiyalar 5,6 barobarga, pudrat ishlari 5 barobarga, sanoat mahsulotlari ishlab chiqarish
4.7 barobarga oshgani  iqtisodiy oʻsishning barqarorligidan dalolat.

Soʻnggi etti yilda tadbirkorlarni moliyaviy qoʻllab-quvvatlash borasida tijorat banklari tomonidan
30 trln.soʻmdan ortiq kredit mablagʻlari yoʻnaltirildi.

Tadbirkorlik loyihalarini amalga oshirish uchun 300 dan ortiq boʻsh turgan davlat mulklari ob'ektlari va 2 mingga yaqin er uchastkalari belgilangan tartibda ajratib berildi.

Namangan tajribasi sifatida 73 ta kichik sanoat va 2 ta erkin iqtisodiy zonalari tashkil etildi. Ushbu sanoat zonalariga 1300 tadan ortiq loyihalar joylashtirilib, 66 mingta dan ziyod yangi ish oʻrinlari yaratilmoqda.

Ta'kidlash joiz, Prezidentimiz tomonlaridan “Namangan tadbirkorlar yurti, oʻrta va kichik biznes markaziga aylandi”, deya berilgan yuksak baho Namangan ahlining hamjihatlik bilan olib borgan ana shu mehnatlari sharofatidir.

Zero, kichik biznes sub'ektlari soni hozirgi vaqtda 37 mingtaga etib, etti yil avvalgiga nisbatan taqqoslaganda 2 barobarga ortdi. Yirik tadbirkorlik sub'ektlari soni 65 tadan 126 taga koʻpaydi.

Aziz doʻstlar!

Yana bir muhim yoʻnalish - xorijiy investor va dunyo brend kompaniyalarining keyingi yillarda mamlakatimizda olib borilayotgan islohotlarga ishonchi ortdi. Shu bois Namangan viloyatida ham xorijiy hamkorlar soni yil sayin ortib boryapti, eksport hajmlarining yuqori sur'atlarda oʻsishi ta'minlanmoqda.

Masalan, xorijiy Investisiyalar hajmi 1,8 mlrd.dollarni tashkil etib, 12 barobarga ortdi hamda qoʻshma korxonalar soni 370 taga etdi.

Joriy yilda 3,0 mlrd.dollar xorijiy investisiya mablagʻlari oʻzlashtirish maqsadida amaliy ishlarga kirishganmiz. Natijada bu koʻrsatkich ham 2017 yilga nisbatan 50 barobarga ortadi.

Aholining ogʻirini engil, uzogʻini yaqin qiladigan eng asosiy masalalar, shubhasiz, bu kommunikasiya sohasi, infratuzilma, turarjoy bilan bogʻliq desak, aslo yanglishmagan boʻlamiz.  

Qarang, yoʻl infratuzilmasini yaxshilash borasida viloyatimizda
2017-2023 yillarda jami 6 803,2 km. uzunlikdagi yoʻllar hamda 26 dona koʻpriklar ta'mirlandi.

Bu ishlar davom ettirilib, joriy yilda  ham 425 km. yoʻllarda asfaltlash hamda 4 dona yoʻl oʻtkazuvchi koʻpriklarda qurilish ishlari amalga oshirilmoqda.

Bundan tashqari, yaqinda xalqimizning uzoq yillik orzusi boʻlgan Pungon-Namangan yoʻnalishidagi 4R112 avtomobil yoʻlini rekonstruksiya qilish ishlari boshlandi.  

Ushbu yoʻnalishda 75 km.  masofadagi avtomobil yoʻli qurilishi Xitoy Xalq Respublikasining dunyoda oʻz brendiga ega Citic Construction kompaniyasi tomonidan boshlab yuborildi.

Shu oʻrinda Toshkent viloyatining Angren shahridan Namangan viloyatining Toʻraqoʻrgʻon tumanigacha boʻlgan 100 kilometr masofada yoʻl boʻyi infratuzilmasini tartibli tashkil qilish boʻyicha “Master reja” loyihasi ishlab chiqilib, takomillashtirilmoqda.

Aholining toza ichimlik suviga boʻlgan ehtiyojini qondirish, bu boradagi muammolarni hal etish ham doimiy e'tiborda.

Xususan, 2017-2023 yillar davomida umumiy hisobda 4360,5 km. ichimlik suvi tarmoqlarini qurish va rekonstruksiya ishlari olib borildi.

Natijada,  485 ming  nafardan ortiq axoli ilk bor ichimlik suvi bilan ta'minlandi va 650 ming nafardan ortiq aholining esa suv ta'minotini yaxshilandi yoki ichimlik suvi bilan ta'minlanish darajasi 56,3 foizdan 82,7 foizga oʻsishiga erishildi.

Masalan, shu mavzuda eng koʻp murojaat kelib tushadigan Pop tumani “Uygʻursoy” mahallasida 23 mlrd.soʻm mablagʻ hisobiga “Axcha” suv inshootidan 18 km. ichimlik suv tortildi, 2,1 km kanalizasiya yangilandi.

Elektr energiyasi ta'minoti borasida ham shunday misollarni keltirish mumkin.

Oʻtgan 7 yil davomida 3,8 ming km. tarmoqlar hamda 2 568 ta transformator punktlari rekonstruksiya hamda modernizasiya qilindi.

Shuning ortidan 1,3 mln. dan ziyod iste'molchilarning elektr ta'minoti yaxshilandi.

Aziz namanganliklar!

Eng asosiysi, infratuzilma barobarida bugun ulkan qurilish maydoniga aylangan Namangan viloyatida jadal suratlar bilan davom etayotgan bunyodkorlik ishlarini, ayniqsa, yangi massiv va “Siti”larni ham har qancha e'tirof etsak arziydi.

Zero, oʻtgan besh-olti yil ichida yaqin tariximizdagi yuz yillar mobaynida uddasidan chiqilmagan qurilishlar amalga oshirildiki, yaqin orada Namangandan chetroqda yurgan kishi bugun oʻzi yashaydigan koʻchasini ham tanimay qolayotgani mubolagʻa emas.

Aholining eng koʻp talab va ehtiyoji hisoblangan turarjoy masalasiga katta e'tibor qaratilib, 2017-2023 yillarda 15 ming 515 ta xonadonli 486 ta koʻp qavatli uylar qurildi.

Misol uchun, Chust tumani “Gulzor” mahallasi hududida tashkil etilgan “Yangi Oʻzbekiston massivi”da barcha qulayliklarga ega 300 ta xonadonli
15 ta koʻp qavatli uylar, 50 qatnovli vrachlik punkti hamda 360 oʻrinli maktabgacha ta'lim muassasalari qurib bitkazilib, foydalanishga topshirildi.

Huddi shunday massiv Pop tumanida ham barpo etildi.

Qurilish haqida gap ketganda, “Yangi Namangan shaharchasi” haqida alohida toʻxtalib oʻtmasdan iloji yoʻq.

“Bir millionlik shahar” maqomini olgan va aholi zichligi katta boʻlgan Namangan viloyatida uy-joy qurish ishlarini kengaytirishni davr talab etmoqda.

Shundan kelib chiqib, 2 yil oldin 1 ming 203 gektarda 200 ming aholi uchun “Yangi Namangan shaharchasi” qurilishi boshlandi. Joriy bosqichda 20 ming xonadonli turar-joy, shaharcha ichida “Talabalar shaharchasi” barpo etilmoqda.

Namangan viloyatidagi eng yirik loyihalardan biri boʻlgan ushbu manzilda 50 mingdan ortiq xonadonli 721 ta turar-joy majmualari, 28 ta umumta'lim maktabi, 24 ta bolalar bogʻchasi, 5 ta shifoxona va maishiy xizmat koʻrsatish ob'ektlari qad rostlaydi.

Ayni paytda dastlabki loyihalar ijrosiga kirishilgan boʻlib, bunyodkorlik jarayoni izchil davom etmoqda.

Muhtaram Prezidentimizning shu yil 25-26 mart kunlari viloyatimizga tashriflari chogʻida ushbu loyihani qoʻllab-quvvatlaganlari bunyodkorlik jarayonlarini yanada tezlatishda muhim omil boʻldi.

Yurtboshimizning tashriflari davomida Uychi tumanida quvvati 228 MVt boʻlgan “Norin GESlar kaskadi” qurilishiga start berilgan edi. Hozirda bu erda qurilish ishlari jadal olib borilmoqda.

Ushbu GESlar kaskadi orqali 228 Mega vattli 6 ta stansiyada yiliga 1 milliard kilovatt elektr energiyasi ishlab chiqarish imkoniyatiga erishiladi.

Hurmatli tantana    ishtirokchilari!

Keyingi yillarda Davlat tashkilotlari oʻzining eng asosiy vazifasi sifatida xalqning ogʻirini engil qilishga kirishgan. Ya'ni aholi bilan muloqot qilib, ularning muammolarini aniqlash va hal etish ustuvor vazifaga aylandi.

Bugungi kunga kelib Namanganda doimiy yashovchi aholi soni 3 mln. 100 ming kishiga yaqinlashdi. Koʻrinib turibdiki, aholi soni yil sayin oʻsib boryapti.

Bu esa islohotlarni tezlatish, xalqimizga qulay sharoitlar yaratishni talab etadi. Shundan kelib chiqib, oldimizga katta marralarni qoʻyganmiz. 

Davlatimiz rahbari  tashabbuslari bilan “Yoshlar va biznesni qoʻllab-quvvatlash yili” deb e'lon qilingan 2024 yilda viloyatimizda ham yurt obodligini ta'minlash, aholi turmush farovonligini oshirish borasida katta ishlar amalga oshirilmoqda.

Joriy yilda maqsadli davlat dasturlari doirasida hududlarda mahalla infratuzilmasini yaxshilash hamda aholini uy-joy bilan ta'minlash maqsadida 964 ta ob'ektda qurilish-ta'mirlash, jihozlash va obodonlashtirish ishlariga 3 trln. 245 mlrd.soʻm mablagʻ yoʻnaltirilmoqda.

Birgina investisiya dasturi doirasida 130 ta ob'ektlarga 930 mlrd.soʻm yoʻnaltirish belgilangan.

Bunda 48 ta maktab, 11 ta maktabgacha ta'lim, 10 ta sogʻliqni saqlash va boshqa ob'ektlar qamrab olingan.

Xabaringiz bor, Davlatimiz rahbarining 2024 yilda “Mahallalar infratuzilmasini yanada yaxshilash boʻyicha qoʻshimcha chora-tadbirlar toʻgʻrisida”gi maxsus qarori bilan Namangan viloyatiga 105 mlrd. soʻm ajratildi.

Bu esa qurilishlarni viloyat markazidan tortib, eng chekka hududlargacha qamrab olish imkonini bermoqda.

Ushbu mablagʻlar evaziga mahallalarda 158 ta loyihalarda infratuzilma bilan bogʻliq eng dolzarb masalalar tizimli hal etilmoqda.

Xususan, joylarda kommunal sohalar, ta'lim, sogʻliqni saqlash va boshqa infratuzilma ob'ektlarini yaxshilash orqali aholi uchun munosib turmush sharoitini yaratishga kirishildi.

E'tibor bering, turli dastur va rejalardan tashqari yana shuncha mahallada aholini uzoq yillardan buyon qiynab kelayotgan muammolarga echim topiladi.

Bugun, ayniqsa, koʻp yillar e'tibordan chetda qolgan, muammolar girdobida boʻlgan eng chekka hududlardagi ichki koʻchalargacha asfalt yotqizilayotgani, elektr tarmoqlari yangilanayotgani, toza ichimlik suvi kirib borayotgani yurtdoshllarimizni behad mamnun qilmoqda, albatta.

Bunday e'tibor va gʻamxoʻrlikdan minnatdor namanganliklar shu ishlarning boshida turgan hurmatli yurtboshimizga rahmatlar aytmoqdalar.

Aziz doʻstlar !

Keyingi yillarda drayverga aylanib borayotgan turizm sohasida ham Namangan beqiyos salohiyatga ega ekanligini alohida ta'kidlamoqchiman. Eng avvalo, maftunkor va betakror tabiatimiz, qadamjolarimiz bor. 

Muhtaram Yurtboshimizning bevosita tashabbuslari bilan qayta hayot bagʻishlanayotgan Axsikent tarixiy yodgorligi bugun dunyo olimlarini oʻziga chorlamoqda.

Qolaversa, Chust tumanining “Rezaksoy” hamda Chortoq tumanidagi “Chortoq suv ombori” hududida eko, dam olish maskanlari, ov va gastronomik turizm xizmatlari tashkil etish boʻyicha ham ishlarimiz bor.

63-Xalqaro gullar festivalining oʻzida Namanganga mamlakatimizning barcha hududlaridan kelgan mehmonlar
6 mln.ga etgani, xorijiy sayyohlar esa 200 mingdan oshgani ham sohada foydalanishimiz mumkin boʻlgan imkoniyatlar koʻlami kengligining isbotidir.

Bu oʻzgarishlarning barchasi muhtaram Yurtboshimizning viloyatimizga e'tiborlari natijasi desam, ayni haqiqatni aytgan boʻlaman.

Aziz Namanganliklar!

Yuqorida ta'kidlab oʻtganimdek, bu yil har sohada marrani baland olganmiz.

Yil yakuni bilan viloyat iqtisodiyoti oʻtgan yilga nisbatan 7,0 foizga oʻsishi ta'minlanadi.

Yil yakuni bilan 433 ming nafar aholi bandligi ta'minlanib, ishsizlik darajasi yil boshidagi 7 foizdan 5,2 foizga tushiriladi.

Mahallalarda investisiya dasturiga kiritilmagan 5 000 ta xizmat koʻrsatish ob'ektlari tashkil etiladi.

Aziz yurtdoshlar !

Yangi-yangi gʻoyalarni amalga oshirish, yuksak marralarni zabt etish yoʻlida barchamizni Istiqlol deb atalgan buyuk ne'mat birlashtirib turibdi.

Bu kuchni Yangi Oʻzbekistonni barpo qilish uchun sarf etish, oldimizga qoʻyilgan yuksak maqsadlarga erishishda aynan birdamlik koʻmaklashadi.   

Shuning uchun ham Prezidentimizning «Oʻzbekiston Respublikasi davlat mustaqilligining oʻttiz uch yillik bayramiga tayyorgarlik koʻrish va uni oʻtkazish toʻgʻrisida»gi qarorida Mustaqillik bayrami «Bir boʻlsak – yagona xalqmiz, birlashsak – Vatanmiz!» degan bosh gʻoya asosida oʻtkazilishi qayd etildi. 

Darhaqiqat, mamlakatni yangi taraqqiyot bosqichiga olib chiqish, yangi jamiyat qurish yoʻlida amalga oshirilayotgan barcha islohot xalqimizning jipsligi, birdamligi, ezgu maqsadlar yoʻlida yakdil intilishi natijasi bilan roʻyobga chiqmoqda. 

Yuqorida qisqagina qayd etib oʻtilgan yutuqlarimiz, bunyodkorliklar, eng avvalo, bunyodkor xalqimiz hamjihatligining samarasidir.   

Biz namanganliklar ana shunday buyuk ishlarga  daxldor ekanligimizdan faxrlanib, Yangi Oʻzbekiston kelajagi uchun oʻzimizni yanada qalban safarbar etib yashashga burchlimiz.

Shu tuygʻu  bilan yashash,    Vatanni   sevish, ulugʻlash, mustaqilligimizni asrab-avaylash, bu bayramni bardavomligini koʻrish barchamizga nasib etaversin.

Yana bir bor eng ulugʻ, eng aziz bayram barchamizga muborak boʻlsin!

 Mustaqilligimiz abadiy, Yurtimiz tinch, osmonimiz  musaffo boʻlsin!

Barcha ezgu ishlarimiz boshida turgan Yurtboshimiz doim omon boʻlsinlar!

E'tiboringiz uchun rahmat!