Norin tumanida “Inson” ijtimoiy xizmatlar markazi binosi foydalanishga topshirildi
2024-08-28 23:55:00 / Yangiliklar
“Bir boʻlsak yagona xalqmiz – birlashsak Vatanmiz” shiori ostida keng nishonlanayotgan Mustaqilligimizning 33 yilligi bayramiga Norin tumani “Inson” ijtimoiy xizmatlar markazi binosining ochilishi ajoyib sovgʻa boʻldi.
Markazning ochilishi marosimida Ijtimoiy himoya milliy agentligi viloyat boshqarmasi boshligʻi Xodjiyev Ibrohim Ikramovich, tuman hokimi Nurmatov Joʻrabek Hamidovich, tuman sektorlar rahbarlari, nuroniylar va keng jamoatchilik vakillari ishtirok etdilar.
Tadbirda soʻzga chiqqan ishtirokchilar davlatimiz rahbari tashabbusi bilan soʻnggi yillarda aholining ijtimoiy himoyasini kuchaytirish, fuqarolarga ijtimoiy xizmat koʻrsatish koʻlami va turlarini kengaytirish boʻyicha tizimli ishlar amalga oshirilayotganini eʼtirof etdilar. Shuningdek, “Inson” ijtimoiy xizmatlar markazlari faoliyati yoʻlga qoʻyilishi inson manfaatlari ustuvorligiga qaratilayotgan yuksak eʼtiborning yorqin namunasi ekanini taʼkidlab oʻtdilar.
Shu oʻrinda alohida aytib oʻtish lozimki, ushbu markazda fuqarolarga hamda nogironligi bor shaxslarga barcha qulayliklar yaratilgan. Endilikda, norinliklar zamonaviy binoda sifatli ijtimoiy xizmatlardan foydalanish imkoniga ega boʻldilar.
Ijtimoiy himoya milliy agentligi Namangan viloyati boshqarmasi matbuot xizmati