Biznes va investitsiya muhitini yanada yaxshilashga qaratilgan navbatdagi ochiq muloqot bo‘lib o‘tdi.
2026-07-29 20:55:00 / Yangiliklar
Namangan shahridagi “Maʼrifat maskani”da tashkil etilgan uchrashuvda viloyat hokimi Shavkatjon Abdurazzoqov viloyat prokurori Umirbek Madraximov hamda viloyat IIB boshlig‘i, polkovnik Shuxrat Aliyev ishtirokida mahalliy va xorijiy investorlar bilan yuzma-yuz muloqot qildi.
Tadbirkorlar tomonidan kadastr va yer munosabatlari, sud-huquq masalalari, bank kreditlari, soliq yukini yengillashtirish, yangi ish o‘rinlari yaratish hamda ishlab chiqarishni kengaytirishga oid qator dolzarb masalalar ko‘tarildi. Aksariyat murojaatlar shu joyning o‘zida hal etildi.
Viloyat rahbari 50 nafardan ziyod tadbirkorni birma-bir qabul qilib, ularni qiynab kelayotgan muammolarni atroflicha tingladi, taklif va tashabbuslarini qo‘llab-quvvatladi.
Masalan, jarayonda ishtirok etgan tadbirkor Akmal Mirzamov zamonaviy qadoqlash uskunalarini ishlab chiqarishga qaratilgan 4 ta innovatsion loyihasini taqdim etdi. Mazkur loyihalar asosida 4 xil turdagi zamonaviy qadoqlash uskunalarini ishlab chiqarish rejalashtirilgan.
Ushbu uskunalarni seriyali ishlab chiqarishni yo‘lga qo‘yish maqsadida sanoat zonasidan yer maydoni ajratish bo‘yicha murojaat qildi. Murojaat yuzasidan viloyat hokimi mutasaddilarga ushbu masalani o‘rganib chiqish va belgilangan tartibda joy ajratish bo‘yicha topshiriq berildi.
Muhokamalar jarayonida vaqt talab etadigan masalalarni belgilangan muddatlarda hal etish bo‘yicha masʼul tashkilotlarga topshiriqlar berildi va ularning ijrosi nazoratga olindi.