Chorvachilik yo‘nalishidagi tadbirkorlarni qo‘llab-quvvatlash masalalari muhokama qilindi
2026-07-22 23:35:00 / Yangiliklar
Uchrashuvda sohada faoliyat yuritayotgan 30 nafardan ziyod tadbirkorlar, shuningdek, mutasaddi tashkilotlar rahbarlari ishtirok etdilar.
Muloqot davomida tadbirkorlar o‘z faoliyatida uchrayotgan muammo va takliflarini bevosita viloyat rahbariyatiga yetkazish imkoniga ega bo‘ldi. Xususan, imtiyozli moliyalashtirish, import jarayonlarini soddalashtirish, bojxona rasmiylashtiruvi, soliq maʼmurchiligi, yer va kadastr masalalari hamda ishlab chiqarish infratuzilmasiga oid murojaatlar atroflicha ko‘rib chiqildi.
Viloyat hokimi sohada tadbirkorlikni rivojlantirish, oziq-ovqat xavfsizligini taʼminlash va aholini sifatli go‘sht mahsulotlari bilan uzluksiz taʼminlashda mazkur yo‘nalishdagi ishbilarmonlarning o‘rni alohida ekanini taʼkidladi.
Murojaatlarning har biri yuzasidan mutasaddi tashkilotlar rahbarlariga aniq topshiriqlar berildi. Ayrim masalalar joyida hal etilgan bo‘lsa, qo‘shimcha o‘rganish talab qiladigan murojaatlar ijrosi masʼullarga biriktirilib, nazoratga olindi.
Taʼkidlanganidek, davlat idoralari bilan tadbirkorlar o‘rtasidagi bunday ochiq muloqotlar sohadagi mavjud to‘siqlarni bartaraf etish, investitsiyaviy muhitni yanada yaxshilash hamda xususiy sektor faoliyatini qo‘llab-quvvatlashda muhim ahamiyat kasb etadi