Beshinchi Toshkent xalqaro investitsiya forumi: Namangan viloyati delegatsiyasi istiqbolli loyihalarni muhokama qilmoqda.
2026-06-16 18:30:00 / Yangiliklar
Mazkur nufuzli xalqaro forumda Namangan viloyati hokimi Shavkatjon Abdurazzoqov boshchiligidagi delegatsiya ham faol qatnashmoqda.
Xususan, Afg‘oniston savdo va investitsiya palatasi raisi Muhammad Karim Xoshimiy bilan savdo va investitsiya yo‘nalishida hamkorlik aloqalari muhokama qilindi.
Italiyaning "Gamma Meccanica" kompaniyasi bilan Chust tumanida amalga oshirilayetgan Bazalt mahsulotlarini ishlab chiqarish loyihasini joriy yil yakuniga qadar bitkazish hamda 2-bosqichda sendvich panellar ishlab chiqarish loyihasini amalga oshirish bo‘yicha yangi kelishuvga erishildi.
Xitoyning "Shenjen Jin Chi Xung" kompaniyasi bilan 3 ta yo‘nalishda jami qiymati 635 mln. dollarlik kelishuvlarga erishilib, memorandum imzolandi.
Amerikaning "Silk road professionals USA" kompaniyasi bilan AyTi sohasida hamkorlik o‘rnatish bo‘yicha muzokara o‘tkazildi.
Xitoyning "Dong huang" kompaniyasi bilan qurilish materiallari, kimyo sanoati mahsulotlari ishlab chiqarish va xizmat ko‘rsatish obyektlarini barpo etish, "Good croup" qishloq xo‘jaligi kompaniyasi bilan Uychi tumanida shirin kartoshka navlarini yetishtirish va qayta ishlash hamda eksport qilish, "Guangxi Dachuan Ecological technology" kompaniyasi bilan maishiy chiqindilarni qayta ishlash va ulardan turli xildagi qurilish materiallari ishlab chiqarish yo‘nalishi bo‘yicha dastlabki kelishuvlarga erishildi.
Shuningdek, Malayziyaning "Spora Global" kompaniyasi bilan Chortoq tumanida turizm kompleksini tashkil etish, Rossiyaning "Farmsintez" kompaniyasi bilan Kosonsoy-farm erkin iqtisodiy zonasi hududida dori vositalari ishlab chiqarish bo‘yicha kelishuvlarga erishildi.
Viloyat hokimi BMT vakillari bilan "Taraqqiyot dasturi" doirasida zamonaviy smart sitilar barpo etish bo‘yicha muzokara olib bordi va vakillar tomonidan taqdimot o‘tkazildi.
Umuman, kun davomida 30 ga yaqin xorijiy kompaniya va biznes doiralari vakillari bilan uchrashuvlar o‘tkazildi.
Forum O‘zbekistonning investitsiyaviy salohiyatini keng namoyish etish, yangi hamkorlik aloqalarini o‘rnatish, zamonaviy texnologiyalarni jalb etish va istiqbolli loyihalarni hayotga tatbiq etish uchun muhim platforma bo‘lib xizmat qilmoqda.
Namangan viloyati hokimligi
Axborot xizmati