O‘zbekiston xalq artisti, "Markaziy Osiyo primadonnasi" Yulduz Usmonova Namanganda konsert berdi
2026-06-05 06:30:00 / Yangiliklar
Bu yerda festivalning kutilgan madaniy tadbirlaridan biri - O‘zbekiston, Qoraqalpog‘iston, Tojikiston xalq artisti, Qozog‘iston, Turkmanistonda xizmat ko‘rsatgan artist, Davlatimizning bir qator yuksak mukofotlari sohibasi Yulduz Usmonova ijrosida namanganliklar va festival mehmonlari uchun katta konsert dasturi tashkil etildi.
Tadbir avvalida Namangan viloyati hokimi Shavkatjon Abdurazzoqov so‘zga chiqib, bu yil yubiley sanasi nishonlanayotgan xalqaro “Gullar festivali”, uning doirasida o‘tkazilayotgan madaniy tadbirlarning ahamiyati haqida to‘xtaldi.
Taʼkidlash joiz, konsert dasturiga kutilganidan ham ko‘p mehmon keldi – 50 000 dan ortiq muxlislar bevosita “Afsonalar vodiysi”da Yulduz Usmonovaning musiqiy guldastasidan bahramand bo‘ldilar.
Ikki soatga yaqin davom etgan dastur ajoyib oqshomda maftunkor manzara kasb etgan tematik park uzra tomoshabinlar jo‘rligida ijro etilgan “Hech kimga bermaymiz Seni, O‘zbekiston!” qo‘shig‘i bilan yakunlandi.
65-xalqaro “Gullar festivali” ana shunday avj pallada davom etmoqda.
Namangan viloyati hokimligi
Axborot xizmati