Mineral va mahalliy o‘g‘itlar bilan oziqlantirish — g‘o‘zaga quvvat, hosilga baraka beradi.
2026-05-26 10:05:00 / Yangiliklar
Namangan viloyati hokimi Shavkatjon Abdurazzoqov bugun erta tongdan Norin tumanida bo‘lib, soha bo‘yicha o‘rinbosar, oqsoqol-maslahatchilar va boshqa mutasaddilar bilan birga g‘o‘za maydonlaridagi agrotexnik tadbirlar holatini o‘rgandi.
Ma’lumotlarga ko‘ra, joriy yil hosili uchun tumanda 4322 gektar maydonda g‘alla, 4701 gektarda esa g‘o‘za parvarish qilinmoqda. Ayni pallada har bir agrotexnik tadbirni o‘z vaqtida va sifatli bajarishga ustuvor ahamiyat berilmoqda.
Ishchi guruhi dastlab “Paxtakor” MMTP hududida joylashgan “Vodiy baraka” klaster fermer xo‘jaligida bo‘lib, g‘o‘zaning rivojlanish jarayoni, qator oralariga ishlov berish va oziqlantirish ishlari bilan tanishdi.
Mazkur xo‘jalikda 500 gektar yer maydonining 250 gektarida “Shinjon” texnologiyasi asosida qo‘shqator ekish usuli joriy etilgan bo‘lib, plyonka ostida tomchilatib sug‘orish tizimi qo‘llanilmoqda. Shuningdek, 250 gektarda g‘o‘za osiq usulda parvarish qilinmoqda.
Shu bilan birga, “Norinlik Asror” fermer xo‘jaligida amalga oshirilayotgan innovatsion yondashuvlar va zamonaviy agrotexnologiyalar samaradorligi tahlil qilindi.
Ikki daryo oralig‘idagi orol hududida rivojlanishdan orqada qolayotgan g‘o‘za nihollariga ishlov berish jarayoni ko‘zdan kechirildi.
Maydonlardagi o‘rganishlar davomida viloyat rahbari fermerlar bilan muloqot qilib, bugungi palla paxta hosili taqdirini belgilaydigan eng muhim bosqich ekanini ta’kidladi. Xususan, begona o‘tlarni bartaraf etish, zararkunanda hasharotlarga qarshi tizimli kurashish hamda suv resurslaridan oqilona foydalanish bo‘yicha tegishli ko‘rsatmalar berildi.
Namangan viloyati hokimligi
Axborot xizmati