Namangan vilоyati hоkimligi

Namangan viloyati hokimligida Turkiyaning TIGTurkey investitsiya agentligi prezidenti Xayreddin Turan, vitse-prezident Mehmet Selim Arvas, Namanganning Turkiyadagi turizm elchisi, ebru san’ati ustasi Ahmet Choktan va taniqli yozuvchi, Qirg‘iz Respublikasida xizmat ko‘rsatgan madaniyat arbobi, Qirg‘iziston, O‘zbekiston, Ozarbayjon yozuvchilar uyushmasi a’zosi Begijon Ahmedovlar bilan uchrashuv bo‘lib o‘tdi.

Viloyat hokimi mehmonlarni samimiy qutlab, nafosat va go‘zallik bayramining ilk kunidagi ishtirok uchun o‘z tashakkurini bildirdi.

Uchrashuvda savdo-iqtisodiy, investitsiya, turizm va madaniy masalalar muhokama markazida bo‘ldi.

- Bizning kompaniya sanoat, qurilish, turizm, yuqori texnologiyalar bilan shug‘ullanuvchi o‘nlab shirkatlarni o‘z ichiga oladi. Bundan tashqari Turkiya, Ko‘rfaz davvlatlari, Afrika mamlakatlarining yirik kompaniyalari birlashtiruvchi uyushmalarimiz bor. Namanganning bir necha kichik sanoat zonalarida bo‘ldik. Ishlab chiqaruvchilarning salohiyati yuqori ekanligiga amin bo‘ldik, - dedi Xayreddin Turan.

Viloyat hokimi o‘zaro aloqalarning mushtarak jihatlari bisyor ekanligini ta’kidlab, hamkorlikni to‘la qo‘llab-quvvatlashini ma’lum qildi. 

- Namangan xalqaro "Gullar festivali" bilan dunyoni lol qildi. Mana ikki kundirki biz bunga amin bo‘ldik. O‘zbekiston deganda ko‘pchilik ko‘zi oldiga Samarqand va Buxoro kelgan. Hozir bu safga Namangan ham qo‘shildi. O‘sha mashhur ikkilikni bugun bemalol uchlikka aylantirsa bo‘ladi: 

Samarqand sayqali ro‘yi zamin ast, 
Buxoro quvvati islomi din ast, 
Namangon charog‘i husni jahon ast!
(Namangon jahon husnining mash’alidir!). 

Namanganni dunyo rekordi bilan tabriklaymiz, - dedi yozuvchi Begijon Ahmedov.

Ahmet Choktan va Selim Arvas turizm, media, savdo-investitsiya bo‘yicha bir necha takliflarini bildirdilar.

Samimiy o‘tgan muloqotda festivalni yanada boyitish, hamkorlikni mustahkamlash yuzasidan fikr-mulohazalar almashildi.

Namangan viloyati hokimligi
Axborot xizmati