Namanganda elektrobuslar davri boshlanmoqda: dastlabki elektrobus 65-xalqaro "Gullar festivali" arafasida test rejimida harakatlanmoqda!
2026-05-23 14:10:00 / Yangiliklar
Tadbirkor joriy yil 7-may kuni bo‘lib o‘tgan selektor yig‘ilishida Davlatimiz rahbariga yangi rejalar haqida maʼlumot bergan edi. Unda Namanganga zamonaviy elektrobuslarni olib kelish maqsadi ham bor.
— Xitoydan dastlab bitta elektrobus olib kelib, test rejimida sinovdan o‘tkazishni boshladik. Agar sinov natijalari ijobiy bo‘lsa, keyinchalik yana 50 tadan 100 tagacha elektrobus olib kelishni rejalashtirmoqdamiz, — deydi tadbirkor.
Uning taʼkidlashicha, elektrobuslarning asosiy afzalliklaridan biri — qish mavsumida anʼanaviy yoqilg‘i taʼminoti bilan bog‘liq muammolardan xoli ekani hamda ekologik jihatdan qulay transport turi hisoblanishidir.
Namangan viloyati hokimi Shavkatjon Abdurazzoqov sinov tariqasida ish boshlagan elektrobus natijalari bilan tanishdi.
Elektrobuslarning yo‘lga qo‘yilishi Namanganda jamoat transporti sifatini yangi bosqichga olib chiqish, ekologik barqarorlikni taʼminlash va aholiga qulay xizmat ko‘rsatish imkoniyatlarini kengaytirishi kutilmoqda.