Namangan viloyati hokimi media sohasi vakillari bilan uchrashdi: kun tartibida 65-xalqaro "Gullar festivali".
2026-04-30 10:10:00 / Matbuot anjumanlari
Namangan viloyati hokimi Shavkatjon Abdurazzoqov ommaviy axborot vositalari vakillari,jurnalist va blogerlar bilan uchrashib, bu yilgi festivalning oʻziga xos jihatlari haqida maʼlumot berdi.
Ochiq muloqot tarzida oʻtgan matbuot anjumanida joriy yilda 65-marotaba tashkil etiladigan Xalqaro "Gullar festivali"ga tayyorgarlik ishlari, mavjud masalalar va takliflar atroflicha muhokama qilindi.
Tadbirda jurnalistlar festivalni yuqori saviyada yoritish, axborot tarqatishda zamonaviy yondashuvlarni joriy etish, xorijiy sayyohlar oqimini oshirishga xizmat qiluvchi PR-kompaniyalarni kuchaytirish yuzasidan oʻz fikr-mulohazalarini bildirishdi. Shuningdek, infratuzilmani yaxshilash, transport va logistika, mehmonlar uchun qulay shart-sharoitlar yaratish kabi masalalar ham kun tartibidan oʻrin oldi.
Viloyat rahbari barcha takliflar eʼtibor bilan oʻrganilishini, festival nafaqat goʻzallik bayrami, balki hududning investitsiyaviy va turistik salohiyatini namoyon etuvchi muhim maydon ekanini taʼkidladi.
Uchrashuvda media vakillari bilan yaqin hamkorlikda ish olib borish, festivalni xalqaro miqyosda keng targʻib qilish ustuvor vazifa sifatida belgilandi.
Namangan viloyati hokimligi
Axborot xizmati