Namangan shahrida aholi uchun munosib sharoit yaratishga qaratilgan navbatdagi yirik renovatsiya loyihasi yuzasidan taqdimot oʻtkazildi.
2026-04-03 20:55:00 / Yangiliklar
Bugun Namangan viloyati hokimligi majlislar zalida viloyat hokimi Shavkatjon Abdurazzoqovga loyiha boʻyicha taqdimot oʻtkazildi.
Unda mazkur renovatsiya loyihasining mazmun-mohiyati, amalga oshirish mexanizmlari hamda aholi manfaatlarini taʼminlash masalalari atroflicha muhokama qilindi.
Taqdimot davomida hududdagi eskirgan uy-joylar oʻrnida zamonaviy koʻp qavatli turar joylar, ijtimoiy obʼektlar va muhandislik infratuzilmasini barpo etish rejalari bayon etildi. Shuningdek, yoʻl-transport tizimini takomillashtirish, yashil hududlarni kengaytirish kabi ustuvor vazifalarga alohida eʼtibor qaratilmoqda.
Yigʻilishda mutasaddilar tomonidan loyihani amalga oshirishda ochiqlik va shaffoflikni taʼminlash, aholi bilan doimiy muloqot oʻrnatish, har bir qarorda fuqarolar manfaatlarini ustuvor qoʻyish zarurligi taʼkidlandi.
Viloyat hokimi bu yuzasidan mutasaddi tashkilotlar rahbarlariga aniq topshiriqlar berdi.
Ushbu loyiha nafaqat shahar arxitekturasini yangilash, balki hududning investitsiyaviy jozibadorligini oshirish, yangi ish oʻrinlari yaratish orqali iqtisodiy faollikni kuchaytirishga xizmat qiladi.