Namangan tumani Qumqo‘rg‘on MFY hududidagi “Bibi mushkulkushod maqbarasi” ziyoratgohi rekonstruksiya qilinadi.
2026-04-02 19:20:00 / Yangiliklar
Namangan viloyati hokimi Shavkatjon Abdurazzoqovning tashabbusi bilan hozirgi kunda biroz qarovsiz holga kelib qolgan ziyoratgohni qayta rekonstruksiya qilish bo‘yicha loyiha ishlab chiqildi.
Unga ko‘ra, bu yerdagi keyingi yillarda qo‘lbola usulda, pala-partish qurilgan nostandart xona va shiyponlar o‘rnida zamonaviy dam olish maskanlari qurilib, maqbara barpo etiladi, hudud obodonlashtiriladi.
Viloyat hokimi loyiha taqdimoti bilan tanishib, uni yanada takomillashtirish bo‘yicha ko‘rsatmalar berdi.
Shu yerda jonliq so‘yilib, nuroniylar tomonidan ezgu ishga "oq fotiha" berildi.
Ushbu loyiha yurtimizda muqaddas qadamjolarni asrab-avaylash, ularning tarixiy va maʼnaviy ahamiyatini keng targ‘ib qilish yo‘lidagi muhim qadamlardan biri bo‘ldi.
Namangan viloyati hokimligi
Axborot xizmati