“Musaffo iqlim” MCHJ faoliyatini tubdan yaxshilash: chiqindilarni boshqarishda yangi bosqich
2026-03-01 17:45:00 / Yangiliklar
Xususan, Davlatobod tumanidagi "Yuksalish", Yangi Namangan tumanidagi Abu Rayxon Beruniy, Namangan shahridagi "Obi hayot" mahallalarida tashkil etilayotgan "namunali chiqindixona" loyihasi bilan tanishdi.
Viloyat rahbariga chiqindilarni boshqarish tizimini samarali yo‘lga qo‘yish maqsadida "Musaffo Iqlim" MCHJ faoliyatini yanada takomillashtirish bo‘yicha ishlab chiqilgan chora-tadbirlar taqdimot qilindi.
Bugungi kunda mazkur jamiyat Namangan shahri, Davlatobod va Yangi Namangan tumanlarida istiqomat qiluvchi 964 ming nafar aholiga xizmat ko‘rsatib kelmoqda. Chiqindilarni olib ketish uchun 98 ta maxsus texnika mavjud. Xizmat hududida 17 812 nafar yuridik shaxs faoliyat yuritayotgan bo‘lib, shundan 4 516 tasi aynan ushbu tashkilot bilan chiqindilarni olib ketish bo‘yicha shartnoma tuzgan.
Mazkur raqamlar korxonaning imkoniyatlari mavjudligini ko‘rsatsa-da, so‘nggi kunlarda ijtimoiy tarmoqlarda bildirilgan noroziliklar asosida o‘tkazilgan o‘rganishlar muammolar ham yetarli ekanini ochiq ko‘rsatdi.
Ushbu murakkab vaziyatdan chiqish maqsadida tizimga yangi investor jalb etildi. Rejalarga ko‘ra, nosoz holga kelgan 37 ta maxsus texnika taʼmirlanib, qayta xizmatga jalb etiladi. Qo‘shimcha ravishda 12 metr kub hajmli 10 ta yangi maxsus texnika xarid qilinadi. Bugunning o‘zida Namangan shahrining o‘ziga 60 ta texnika jalb etilib, to‘planib qolgan chiqindilarni maxsus poligonga olib chiqib ketish choralari ko‘rilmoqda.
Viloyat hokimi tizimda ish boshlagan yangi investor bilan muloqotda mavjud sharoit va imkoniyatlarni taxlil qilib, aholiga sifatli xizmat ko‘rsatish, viloyat markazini toza saqlash yuzasidan ko‘rsatmalar berdi.
Namangan viloyati hokimligi
Axborot xizmati