Namangan viloyati hokimi Shavkatjon Abdurazzoqov "Ko‘zi ojizlar" jamiyatiga qarashli ko‘p qavatli turar joylarda yashovchi aholi holidan xabar oldi.
2026-02-28 14:30:00 / Yangiliklar
Namangan shahrining “Sharshara” mahallasi “Maʼrifat” ko‘chasida 2 ta 2 qavatli, 36 xonadondan iborat mo‘jaz maskan bor. «Ko‘zi ojizlar» jamiyatiga qarashli ushbu xonadonlarda 118 nafar aholi istiqomat qiladi. Ularning 28 nafari nogironligi bo‘lgan shaxslar hisoblanadi.
Viloyat rahbari aholi vakillari bilan uchrashib, hol-ahvol so‘radi, muborak Ramazon bilan tabrikladi. Samimiy o‘tgan muloqot davomida muhtaram Prezidentimiz rahnamoliklarida amalga oshirilayotgan islohotlar, ezgu amallar eʼtirof etildi. Shuningdek, homiylar tomonidan 36 ta xonadonning har biriga eng zarur oziq-ovqat jamlanmalaridan iborat Ramazon tuhfalari topshirildi. Ramazon oyida bu kabi ezgu amallar yana davom etishi taʼkidlandi.
O‘z navbatida, aholi vakillari bugungi kunlariga, tinch-osuda hayotga shukrona aytib, Davlatimiz Rahbariga minnatdorlik bildirdilar. O‘zbekiston taraqqiyoti bardavom, yurtboshimiz omon bo‘lishini tilab, duolar qilindi.
- 20 yildan beri shu yerda yashayman. Bundan 5 yil muqaddam, yaʼni 2021 yilda viloyat hokimi tashabbusi bilan uylarimiz mukammal taʼmirdan chiqarilib, mavjud muammolarimiz bartaraf etilgan edi. Shundan buyon tez-tez xabar olib turishadi. Shu ezgu ishlarning boshida turgan Prezidentimizga ming rahmat, - deydi 1-guruh nogironligi bor Zahroxon To‘lasheva.
Uchrashuv davomida viloyat hokimi aholi muammolari bilan ham qiziqdi. Xususan, ularning murojaatiga asosan, 2 ta 2 qavatli uy yana taʼmirlab beriladigan, tabiiy gaz taʼminoti yaxshilanadigan bo‘ldi.
Namangan viloyati hokimligi
Axborot xizmati