Namangan shahridagi viloyat ko‘p tarmoqli tibbiyot markazida qurilish-taʼmirlash ishlari olib borilmoqda.
2026-02-01 17:05:00 / Yangiliklar
Maʼlumki, kapital taʼmirlash jarayonida iqtisodiy jihatdan maqsadga muvofiq emas, deb topilgan eski binolarni buzish va ular o‘rnida barcha zamonaviy talablarga javob beradigan, yuqori texnologiyali tibbiy xizmatlarni ko‘rsatish imkonini beruvchi 9 qavatli yangi bino barpo etish ishlari olib borilmoqda.
Yangi qurilayotgan binoda 200 qatnovli poliklinika, qabulxona va diagnostika bo‘limi, jarrohlik, urologiya, gastroenterologiya, ginekologiya, kardiojarrohlik, gistologiya, patanatomiya, yiringli jarrohlik, transplantologiya bo‘limlarini joylashtirish rejalashtirilgan.
Viloyat hokimi qurilish ishlarini jadallashtirish, ishchi guruh tomonidan aniqlangan kamchiliklarni o‘z vaqtida bartaraf etish hamda qurilish-taʼmirlash ishlarini sifatli va belgilangan muddatlarda yakunlash bo‘yicha masʼullarga tegishli topshiriq va ko‘rsatmalar berdi.
Shundan so‘ng, “Obi hayot” mahallasi Hamroh ko‘chasida barpo etilayotgan ko‘p qavatli turar joylar qurilishi jarayonlari o‘rganildi. Xususan, “Santex polimer” MCHJ tomonidan savdo va maishiy xizmat ko‘rsatish shoxobchalarini o‘z ichiga olgan holda barpo etilayotgan turar joy majmuasida bo‘lib, qurilish jarayonlari, amalga oshirilayotgan ishlar sifati hamda ularning belgilangan loyiha, reja va talablarga muvofiqligi ko‘zdan kechirildi.
Namangan viloyati hokimligi
Axborot xizmati