Chiqindini qayta ishlash: ekologiya yoʻnalishidagi zamonaviy va foydali loyiha.
2026-02-02 10:45:00 / Yangiliklar
"Zarafshon" MFY hududidan ekosanoat zonasini tashkil etish uchun tanlab olingan 15 gektar yer maydonining 10 gektarida “Everbright Environmental Energy Namangan” MCHJ XK tomonidan xitoylik investorlar bilan hamkorlikda amalga oshirilayotgan mazkur loyiha qiymati 150 mln. dollarni tashkil etadi.
Bugun Namangan viloyati hokimi Shavkatjon Abdurazzoqov ushbu manzilda boʻlib, qurilish jarayonlarining borishi bilan yaqindan tanishdi. Xorijiy investorlar bilan suhbatlashib, muammolarini oʻrgandi, ularni bartaraf etish yuzasidan mutasaddilarga tegishli topshiriq va koʻrsatmalar berdi.
Xitoylik hamkorlar bilan qurilish jarayonini tezlatish va yil oxiriga qadar loyihani toʻliq ishga tushirish yuzasidan kelishib olindi.
Maʼlumot uchun: loyiha ishga tushishi hisobiga 547,5 ming tonna chiqindi qayta ishlanadi, 310 mln kVt·soat elektr energiyasi ishlab chiqariladi, shundan 254 mln kVt·soati tarmoqqa uzatiladi. Bu, qariyib 300 ming aholining yillik elektr energiyaga boʻlgan ehtiyojini qoplaydi. Eng asosiysi, yangi loyiha natijasida 180 nafar yurtdoshlarimizning doimiy bandligi taʼminlanadi.
Namangan viloyati hokimligi
Axborot xizmati