Norin tumanida xizmat koʻrsatish va turizm rivojlantiriladi.
2026-01-29 17:55:00 / Yangiliklar
Bugungi oʻrganishlar Norin tumanidan boshlandi.
Norin daryosining "Yuqori Choʻja" MFY hududidan oqib oʻtuvchi 2,6 km qismida sohil boʻyi turizim majmuasi barpo etiladi. Viloyat hokimi obʼekt loyihasi bilan tanishib, uni takomillashtirish, hududda sohil boʻyi turizmi xizmatlarini shakllantirish lozimligini taʼkidladi.
Choʻja qishlogʻidan Haqqulobod shaharchasigacha boʻlgan asosiy yoʻlning ikki chetida baliq savdosi bilan shugʻullanayotgan oʻnlab shoxobchalar bor. Ular faoliyatini tartibga solish, sotuvchi va xaridorlarga sharoit yaratish vaqti keldi. Oʻrganishlar davomida ushbu masalaga alohida eʼtibor qaratildi.
"Buloqli mozor" ziyoratgohi ham odamlar eng koʻp tashrif buyuradigan maskanlardan. Ayniqsa, yoz mavsumida ziyoratchilar soni ortadi. Lekin bu yerda ularga yaratilgan zarur sharoitlar talab darajasida emas.
Viloyat rahbari ichki turizmni rivojlantirish, sayyohlar oqimini oshirish uchun, eng avvalo, zaionaviy sharoit yaratish lozimligini taʼkidlab, ushbu obʼekt boʻyicha alohida loyiha ishlab chiqish yuzasidan masʼullarga tegishli topshiriqlar berdi.
Keyingi manzil "Yangi Namangan" mahallasi boʻldi. Xabaringiz bor, bu yerda "Yangi Oʻzbekiston qiyofasidagi mahalla" dasturi doirasida keng koʻlamli qurilish-obodonlashtirish ishlari olib borilmoqda.
Viloyat hokimi jarayon bilan tanishib, qurilishlarni tezlatish va sifatga eʼtibor berish, har bir loyihani belgilangan muddatda yakunlash lozimligini taʼkidladi.
Namangan viloyati hokimligi
Axborot xizmati