“NANO PHARMACEUTICAL” farmatsevtika korxonasining birinchi bosqichi ishga tushirildi
2025-12-30 11:50:00 / Yangiliklar
Tadbirda Namangan viloyati hokimi Shavkatjon Abdurazzoqov ishtirok etib, yig‘ilganlarni kirib kelayotgan 2026-yil bilan tabrikladi hamda aholi salomatligini taʼminlash, sog‘liqni saqlash tizimini rivojlantirish davlat siyosatida ustuvor yo‘nalish ekanini taʼkidladi.
Qayd etilishicha, bugungi kunda Namangan viloyatida 811 ta tibbiyot muassasasi faoliyat yuritib, shundan 242 tasi davlat, 569 tasi xususiy sektor hissasiga to‘g‘ri keladi. Bu sog‘liqni saqlash sohasida davlat va xususiy sektor hamkorligi izchil yo‘lga qo‘yilganidan dalolat beradi.
Umumiy qiymati 20 million dollar bo‘lgan mazkur loyiha doirasida 10 million dollardan ziyod xorijiy investitsiya o‘zlashtirilib, xalqaro standartlarga javob beradigan zamonaviy farmatsevtika korxonasi barpo etildi. Natijada 300 ta yangi ish o‘rni yaratildi.
Korxonada yiliga 63 million dona, 40 turdagi, qiymati 12 million dollarlik tayyor dori vositalari ishlab chiqarilishi rejalashtirilgan bo‘lib, shundan 6 million dollarlik mahsulot eksportga yo‘naltiriladi.
Marosim yakunida viloyat hokimi korxona jamoasi va quruvchilarga minnatdorchilik bildirib, yangi korxonaning kelgusi faoliyatiga omad tiladi.
Namangan viloyati hokimligi
Axborot xizmati