Namangan vilоyati hоkimligi

Dastlab Uychi ko‘chasida olib borilayotgan renovatsiya jarayoni haqida axborot berildi. 

Namangan shahrining bosh rejasiga asosan Uychi ko‘chasini zamonaviy ko‘rinishga keltirish va kengaytirish ishlari  davom etmoqda. 2-bosqichda ko‘chaning 1,2 km uzunlikdagi qismida 16 ta ko‘p qavatli turar-joy hamda 2 ta noturar bino-inshootlar qurilishi rejalashtirilgan. Loyiha doirasida shahar ko‘rkini buzib turgan jami 66 ta eski imoratlar, shu jumladan 63 ta turar-joy va 3 ta noturarjoy o‘rnida  zamonaviy ko‘p qavatli binolar barpo etiladi. 

Viloyat markazida yana bir muhim yangilik – yirik savdo markazlari, bozorlar atrofida ko‘p qavatli avtoturargohlar barpo etish ham rejalashtirilmoqda.

Xususan, “Chorsu dahasi” hamda “Sardoba” bozori hududida qurilishi maqsad qilingan ana shunday loyihalar taqdimoti bo‘lib o‘tdi.
 
Xabaringiz bor, Namangan shahridagi “Jahon bozori” hududida qo‘p qavatli avto turargoh yaqin orada foydalanishga topshiriladi. Jami 400 avtomobil sig‘imiga ega bo‘lgan ushbu bino qariyib 1,5 gektar maydonni egallaydigan avtomobillarni uncha katta bo‘lmagan joyda saqlash imkonini beradi. 

Albatta, shahar markaziy ko‘chalaridagi va bozorlar oldidagi tirbandliklar oldini olishda bu kabi loyihalar samarali yechim hisoblanadi. 

Viloyat hokimi "Bir millionlik shahar" maqomini olgan Namangan uchun bu kabi ko‘p qavatli turarjoy hamda avtoturargohlar katta ahamiyatga ega ekanligini taʼkidlab, loyihalarni takomillashtirish yuzasidan masʼullarga tegishli topshiriqlar berdi.       

Namangan viloyati hokimligi
Axborot xizmati