Yangiqo‘rg‘on: yangi loyihalar ijrosi nazoratda
2025-12-23 15:20:00 / Yangiliklar
O‘rganishlar 1-umumtaʼlim maktab dastur doirasida olib borilayotgan taʼmirlash-bunyodkorlik ishlarini ko‘zdan kechirishdan boshlandi.
Mazkur taʼlim maskanida 13,3 mlrd. so‘m mablag‘ evaziga mavjud bino taʼmirlanib, qo‘shimcha 600 o‘rinli bino qad rostlamoqda.
Viloyat hokimi sinf xonalarini jihozlash, bolalarning bilim olishga qiziqishini kuchaytirish va ular uchun qulay muhit yaratish masalalariga alohida eʼtibor qaratdi.
"Buloqboshi" mahallasida faoliyat yuritayotgan “Namangan sharbati” MCHJ tomonidan 1.6 gektar yer maydonida mevani qayta ishlash loyihasi amalga oshirilmoqda.
Qiymati 25,0 mln. dollarni tashkil etayotgan loyiha yiliga 25,0 ming tonna mahsulotni qayta ishlash quvvatiga ega va yakuniga yetgach, 150 ta yangi ish o‘rinlari yaratiladi.
Yana bir tadbirkor - Rustam Omonov tomonidan umumiy qimati 8.0 mlrd.so‘m bo‘lgan meva quritish korxonasi ishga tushirilgan. Yiliga 4 ming tonna mevani qayta ishlash quvvatiga ega mazkur korxonada 30 nafar fuqaroning bandligi taʼminlangan.
Isroil Darvonov rahbarlik qilayotgan “ZARKENT DUR TOSH KONLARI” MCHJ tomonidan “Madaniyat” mahallasi hududida quvvati 2 ming kV.t bo‘lgan quyosh panellarini o‘rnatish loyihasi amalga oshirilmoqda. Umumiy qiymati 8 milliard so‘mni tashkil etuvchi ushbu loyiha doirasida 10 nafar fuqaroning bandligi taʼminlanishi ko‘zda tutilgan.
“Zarkent qirmizi mevasi” agrofirma hududidagi "Chorvador" fermer xo‘jaligi tomonidan 584 bosh zotli qo‘y parvarishlanmoqda. Mongoliyadan keltirilib, tumanning iqlim sharoitiga moslashtirilgan ushbu qo‘ylar zoti go‘sht va jun yetishtirishga mo‘ljallangan.
Viloyat rahbari ushbu obyektlarda bo‘lib, yangi loyihalar ijrosini o‘rgandi. Jarayonlarni tezlatish va bunday loyihalarni yanada ko‘paytirish yuzasidan topshiriqlar berdi.
Yangiqo‘rg‘on tumani hokimligi
Axborot xizmati