«III Namangan xalqaro zotdor chorva hayvonlari va parrandalar koʻrgazmasi» barchada katta qiziqish uygʻotmoqda
2025-11-22 13:10:00 / Yangiliklar
Tadbirning tantanali ochilishi marosimida Namangan viloyati hokimi Shavkatjon Abdurazzoqov soʻzga chiqib, keyingi yillarda mamlakatimizda hurmatli Prezidentimiz rahnamoliklarida turizm rivojiga qaratilayotgan katta eʼtibor natijasida xalqaro miqyosdagi tadbirlar soni ortib borayotganini eʼtirof etdi. Bugungi koʻrgazma ham nafaqat mahsulot yoki hayvon zotlari namoyishi, balki rivojlanish strategiyasi, kelajak rejalari, hamkorlik istiqbollarining muhim maydoni ekanini taʼkidladi.
Joriy yilning oʻzida viloyatda qoramollar bosh soni 12,1 foizga, qoʻy va echkilar 11,4 foizga, parrandalar esa 44,3 foizga koʻpaygan. Ayniqsa, sohada naslchilikka alohida eʼtibor qaratilayotgani oʻz samarasini bermoqda.
Koʻrgazmada ushbu raqamlar oʻz isbotini topdi: yuzdan ziyod zotdor ot, tuya va qoramollar, noyob qoʻy va echki turlari, parrandalar barchada katta qiziqish uygʻotmoqda.
Xalqaro festival darajasiga koʻtarilgan ushbu tadbirda qoʻshni Qirgʻiz Respublikasidan ham bir guruh soha vakillari ishtirok etishmoqda. Bugun kechga qadar davom etadigan tadbir yakunida turli nominatsiyalar boʻyicha gʻolib boʻlganlar qimmatbaho esdalik sovgʻalari bilan taqdirlanadi.
Namangan viloyati hokimligi
Axborot xizmati