Eski bogʻlar tarixga aylandi: Yangiqoʻrgʻonda intensiv olxoʻri bogʻi barpo etilmoqda
2025-11-21 16:30:00 / Yangiliklar
Mamlakatimizda qishloq xoʻjaligi sohasida olib borilayotgan islohotlar natijasida iqtisodiy samarasiz va eskirgan bogʻlar oʻrnida yangi mevazorlar barpo etilmoqda.
Yangiqoʻrgʻon tumanidagi “Said Baraka Doli Sattarov” agrofirmasi hududidagi “Choʻlpanova Lolaxon” fermer xoʻjaligiga qarashli 10 gektar ana shunday bogʻ oʻrnida zamonaviy, sanoatlashgan intensiv olxoʻri bogʻi yaratish loyihasi amalga oshirilmoqda.
Namangan viloyati hokimi Shavkatjon Abdurazzoqov loyiha doirasida olib borilayotgan ishlar bilan tanishdi.
Umumiy qiymati 600 mln.soʻmni tashkil etgan loyihaga asosan Turkiya davlatidan 8 ming tup eksportbop “Black Splendor” navli olxoʻri koʻchatlari olib kelish rejalashtirilgan. Loyiha yakuniga yetgach 10 ta yangi ish oʻrini yaratiladi.
Shuningdek, hududda suv yoʻllarini tartibga solish, betonlash yumushlari ham bajarilmoqda.
Namangan viloyati hokimligi
Axborot xizmati