Zamonaviy soha - Axborot texnologiyalariga qiziqqan yoshlar bilan muloqot boʻlib oʻtdi
2025-11-15 14:00:00 / Yangiliklar
Namangan viloyat hokimi Shavkatjon Abdurazzoqov bu gal axborot texnologiyalari yoʻnalishida faoliyat olib borayotgan yoshlar bilan uchrashdi.
Unda viloyatdagi huquqni muxofaza etuvchi idoralar rahbarlari, tegishli tashkilot, muassasalar mutasaddilari, Axborot - kommunikatsiya yoʻnalishida tahsil olayotgan talabalar va AyTiga qiziqqan yoshlar ishtirok etdilar.
Namangan viloyatida ayni sohada oxirgi 5 yil davomida 12 ta markaz faoliyati yoʻlga quyildi, Namangan shahrida IT Parkining Namangan filiali tashkil etildi, shuningdek, “Bir million dasturchi” loyihasi doirasida 480 ming nafar yoshlar oʻqitildi.
Namangan Davlat Universitetining Yangi Namangan shaharchasida joylashgan yangi binosida tashkil etilgan navbatdagi “Hokim va yoshlar” uchrashuvi ushbu yutuqlar va kelgusi vazifalar muhokamasiga bagʻishlandi.
Samimiy muloqot shaklida oʻtgan uchrashuvda axborot texnologiyalari sohasida tahsil olayotgan talabalar, oʻquv markazlarida ishlayotgan yosh mutaxassislar, oliy taʼlim muassasalarining mustaqil tadqiqotchilari axborot texnologiyalari sohasini rivojlantirish, sunʼiy intellekt, raqamlashtirish boʻyicha oʻz loyihalari, gʻoyalari va ilmiy izlanishlari haqida fikr-mulohazalarini bildirib, murojaatlarini yoʻlladilar.
Muloqot davomida yoshlarning aksariyat murojaatlariga shu yerda yechim topildi. Vaqt talab etiladiganlariga tegishliligi boʻyicha hal etish uchun soha rahbarlariga aniq topshiriqlar berildi.
Namangan viloyati hokimligi
Axborot xizmati