Hazoraspda g‘alla o‘rimiga shaylik: 16 ta yuqori unumli kombayn mavsumga tayyor
2026-05-14 09:35:00 / Yangiliklar
Hazorasp tumanida 2026-yil hosili uchun yetishtirilgan g‘allani nes-nobud qilmasdan yig‘ib olish maqsadida tizimli tayyorgarlik ishlari amalga oshirilmoqda.
Bugun tuman hokimi M. Abdullayev, viloyat ishchi guruhi hamda soha mutaxassislari ishtirokida Sanoat hududidagi “Soliy Turkman” fermer xo‘jaligida o‘quv-amaliy seminar tashkil etildi. Tadbirda asosiy e’tibor o‘rim-yig‘im mavsumini uyushqoqlik bilan o‘tkazish va texnik xavfsizlik masalalariga qaratildi.
Seminarda ishchi guruh tomonidan kombaynlarning texnik holati, ularning yong‘inga qarshi vositalar bilan jihozlangani hamda yoqilg‘i-moylash materiallari zaxirasi ko‘zdan kechirildi.
Shuningdek, otryad a’zolarining favqulodda vaziyatlarda harakatlanish bo‘yicha ko‘nikmalari sinovdan o‘tkazildi. Hosilni daladan to xirmongacha nest-nobud qilmasdan yetkazish bo‘yicha mas’ullarga tegishli ko‘rsatmalar berildi. Mavsumda qatnashadigan mexanizatorlar va ishchilar uchun yaratilgan madaniy-maishiy sharoitlar ham tahlil qilindi.
“Asosiy maqsadimiz — zahmatkash dehqonlarimizning peshona teri evaziga yetishtirilgan har bir donni o‘z vaqtida va sifatli yig‘ib olishdir”, — deya ta’kidlandi seminarda.
Hozirda Hazorasp tumanida o‘rim-yig‘im mavsumiga barcha kuch va vositalar to‘liq shay holatga keltirilgan.
Ma’lumot o‘rnida, Hazorasp tumanida 2026-yil hosili uchun 112 ta fermer xo‘jaligi tomonidan 2 600 gektar maydonda g‘alla ekilgan bo‘lib, mavsumda qatnashadigan 16 ta yuqori unumli g‘alla o‘rish kombayni mavjud. Barcha texnikalar maxsus komissiya ko‘rigidan o‘tkazilib, foydalanishga qabul qilindi.
Hazorasp tumani hokimligi
matbuot xizmati