Hazorasplik 75 yoshli bogʻbonning “tilla” limonlari: Mehnat va tajriba maktabi
2026-04-23 10:35:00 / Yangiliklar
Hazorasp tumanida Rustam ota Xajiyevni tanimaydigan, uning mehnatsevarligiga havas qilmaydigan inson boʻlmasa kerak. Garchi otaxon 75 yoshni qarshilagan boʻlsa-da, hali-hamon gʻayrati baland, qoʻli gul bogʻbon sifatida barchaga ibrat boʻlib kelmoqda.
2 sotixdan — katta daromad sari
Otaxonning tadbirkorlik yoʻli 2016-yilda boshlangan. Oʻshanda bor-yoʻgʻi 2 sotix yerda kichik issiqxona tashkil qilib, 15–20 tub limon koʻchati ekkan edi. Tinimsiz izlanish va yerga boʻlgan mehr oʻz samarasini berdi. Qisqa vaqt ichida issiqxona maydoni avval 8 sotixga, bugungi kunga kelib esa 15 sotixga yetdi.
Hozirda otaxonning issiqxonasida 200 dan ortiq limon daraxtlari gurkirab hosil bermoqda. Eʼtiborlisi, har bir tub daraxtdan 100 kilogrammgacha hosil olinmoqda. Bu — nafaqat oilaviy daromad, balki ichki bozorimizni sifatli va arzon mahsulot bilan taʼminlash demakdir.
Limonzor ichidagi "sirus bogʻi"
Rustam ota faqat limon bilan cheklanib qolmagan. Uning issiqxonasida ekzotik apelsin va mandarin koʻchatlari ham parvarishlanmoqda. Shuningdek, otaxonning ixlosi baland boʻlgan yana bir yoʻnalish — uzumchilik.
- 30 sotix maydonda uzum eshkomlari tayyorlangan;
- 500 dona sara uzum koʻchatlari parvarish qilinmoqda.
"Davlatimiz gʻamxoʻrligini har qadamda his qilamiz"
Suhbat davomida Rustam ota bugungi kunda yaratilgan imkoniyatlar haqida toʻlqinlanib gapirdi:
“Men 75 yoshdaman va shunday zamonda yashayotganimdan baxtiyorman. Nima ish qilaman desang, imkoniyat ham, imtiyoz ham yetarli. Davlatimiz rahbarining oqilona siyosati tufayli yurtimiz tinch, inson qadri ulugʻlanmoqda. Bu gʻamxoʻrlik bizni yanada koʻproq mehnat qilishga undaydi”, — deydi otaxon.
Xulosa oʻrnida aytmoqchimizki, Rustam Xajiyevning hayoti va faoliyati — "Yer xazina, mehnat kaliti" degan naqlning yaqqol isbotidir. Bunday tajribali bogʻbonlar bor ekan, yurtimizda qut-baraka va toʻkinlik bardavom boʻlaveradi.
Hazorasp tumani hokimligi matbuot xizmati