“Elektr energetikasi sohasini tartibga solishda yetakchilik va strategik boshqaruv” mavzusida trening bo‘lib o‘tmoqda
2025-02-26 15:20:00 / Yangiliklar
O‘zbekiston Respublikasi Prezidentining “Energetika bozorini rivojlantirish va tartibga solish agentligi faoliyatini tashkil etish chora-tadbirlari to‘g‘risida” 2024 yil 17 yanvardagi PQ-28-son qarorida Energetika bozorini rivojlantirish va tartibga solish agentligi (keyingi o‘rinlarda – Agentlik), mutasaddi davlat idoralari va energetika sohasida faoliyat olib borayotgan korxona xodimlari uchun xalqaro moliya institutlarining ekspertlari, rivojlangan davlatlarning energetika bozori regulyatorlari va boshqa xorijiy mutaxassislar ishtirokida amaliy o‘quv seminarlari, treninglar o‘tkazish alohida belgilab berilgan.
Mazkur qaror ijrosini sifatli va yuqori saviyada bajarish maqsadida Agentlik tomonidan xalqaro moliya institutlarining ekspertlari, rivojlangan davlatlarning energetika bozori regulyatorlari va boshqa xorijiy mutaxassislar ishtirokida doimiy seminar, treninglar o‘tkazilib kelinmoqda.
Xususan, joriy yilning 26-28 fevral kunlari Toshkent shahridagi “Holiday Inn” mehmonxonasida Agentlik tomonidan Energetikani tartibga soluvchilar mintaqaviy assotsiatsiyasi (ERRA) bilan hamkorlikda “Elektr energetikasi sohasini tartibga solishda yetakchilik va strategik boshqaruv” mavzusida trening o‘tkazilmoqda. Mazkur trening Osiyo taraqqiyot bankining texnik ko‘magida amalga oshirilmoqda.
Tadbirda bir qator xorijiy mehmonlar va ekspertlar hamda xalqaro moliyaviy tashkilotlar vakillari ishtirok etishmoqda. Jumladan, Shimoliy Makedoniya Energetika, suv xo‘jaligi va maishiy chiqindilarni boshqarish bo‘yicha xizmatlarni tartibga solish komissiyasi iqtisodiyot bo‘limi boshlig‘i, ERRA tashkiloti raisi – Adriyana Nelkova-Chuchuk, Latviya Kommunal xizmatlar komissiyasi raisi, ERRA Prezidiumi aʼzosi – Alda Ozola, Armaniston Davlat xizmatlarini tartibga solish komissiyasi (PSRC) komissari – Sergey Agxinyan ishtirok etishmoqda. Uch kunlik tadbir mobaynida Energetika regulyatorining huquqlari, majburiyatlari va vazifalari, narxlarni tartibga solish, elektr energiyasi bozorlari kabi yo‘nalishlarda maʼruzalar tinglanadi va muhokamalar bo‘lib o‘tadi.