Safarda loyiha doirasida faoliyat olib borayotgan mutaxassislar, Oliy ta’lim, fan va innovatsiyalar vazirligi, “O‘zto‘qimachiliksanoat” uyushmasi vakillari, Toshkent va Namangan to‘qimachilik va yengil sanoat institutlari o‘qituvchilari hamda ekspertlari ishtirok etmoqda.

Ushbu o‘quv-amaliy treningini amalga oshirishdan asosiy maqsad O‘zbekistonda dual oliy ta’limni joriy etishda Germaniyaning ilg‘or tajribasini yanada yaqindan o‘rganish, mamlakatdagi dual ta’lim tizimi bilan tanishish hamda sohadagi mutaxassislar bilan tajriba almashish va loyiha bo‘yicha ishtirokchilar ko‘nikmalarni oshirishdan iboratdir. Ishtirokchilar safar chog‘ida Germaniyaning Kyoln, Myunxengladbax, Dyusseldorf va Berlin shaharlarida bo‘lishadi.

Dastlab ikki kun davomida o‘zbekistonlik vakillar Quyi Reyn amaliy fanlar universiteti, Dyusseldorfdagi Savdo-sanoat palatasi, Moda va dizayn akademiyasi, HTW 9 Muhandislik va iqtisodiyot oliy maktabiga tashrif buyurib, hududdagi ip yigiruv ustaxonalari va to‘qimachilik fabriklari faoliyatini o‘rganishdi.

Shuningdek, dasturga muvofiq loyiha ishtirokchilari germaniyalik ekspertlar va to‘qimachilik sohasining mutaxassislari bilan uchrashib, dual kasbiy ta’lim va an’anaviy ta’lim o‘rtasidagi farq, xalqaro bozordagi tendensiyalar va zamonaviy yechimlar borasida ham o‘zaro muzokaralar tashkil etilishi rejalashtirilgan.

Dastur yakunida, ishtirokchilar tomonidan Germaniyada olingan tajriba asosida O‘zbekiston sharoitida dual ta’limni tashkil etish bo‘yicha fikr-mulohazalar hamda takliflardan iborat yakuniy hujjat ishlab chiqilib, hamkor tashkilotlarga taqdim etiladi.