Jamoatchilik kengashi aʼzolari va Nodavlat notijorat tashkilotlari vakillari bilan birgalikda Prezident farmoni loyihasi hamda sohada mavjud muammolarni hal etishga qaratilgan ijtimoiy loyihalar muhokama qilindi
2025-01-17 12:00:00 / Vazirlik yangiliklari
“Atrof-muhitni asrash va “yashil iqtisodiyot” yili” doirasida ishlab chiqilgan Davlat dasturi loyihasi yuzasidan oliy taʼlim, ilm-fan va innovatsiyalar yoʻnalishlarida amalga oshirilishi koʻzda tutilgan vazifalar muhokama qilindi.
Mazkur jarayonda Oliy taʼlim, fan va innovatsiyalar vazirligiga yuklatilgan vazifalar, ularning ustuvor yoʻnalishlari, shuningdek, ilmiy-tadqiqotlar, ekologik barqarorlik va innovatsion yondashuvlar orqali mamlakat taraqqiyotiga qoʻshiladigan hissa alohida eʼtiborga olindi.
Muhokama chogʻida atrof-muhitni muhofaza qilish, “yashil” texnologiyalarni rivojlantirish, yuqori malakali kadrlar tayyorlash va ilmiy ishlanmalarni amaliyotga joriy etish boʻyicha kompleks chora-tadbirlar yuzasidan fikr almashildi.
So‘ng Jamoatchilik kengashi raisi Feruza Rashidova taʼlim tizimini tubdan takomillashtirish, ilmiy salohiyatni oshirish, innovatsion yondashuvlarni keng joriy etish, yoshlarni tadqiqotchilik faoliyatga jalb etishda nodavlat tashkilotlarning ushbu jarayonlardagi ishtiroki va roli kabi bir qator muhim masalalarga toʻxtaldi.
Bugungi kunda oliy va kasbiy taʼlim, ilm-fan hamda innovatsiyalar sohasida yuzaga kelayotgan muammolarni hal etish, ularga tizimli va xalqchil yondashuv asosida yechim topish bugungi kunning eng muhim vazifalaridan biriga aylangan. Ayniqsa, bu jarayonda jamoatchilikning, fuqarolik jamiyati institutlarining faol ishtiroki alohida ahamiyat kasb etadi.
Shu maqsadda tashkil etilgan muhokamada nodavlat notijorat tashkilotlari, taʼlim muassasalari rahbarlari, yosh tadqiqotchilar va sohadagi mutaxassislar faol va mazmunli muloqot olib borildi. Ishtirokchilar taʼlim sifatini oshirish, ilmiy faoliyatni ragʻbatlantirish, innovatsiyalarni amaliyotga tatbiq etish, yoshlarni tadqiqotchilikka jalb qilish, shuningdek, inklyuziv taʼlimni keng joriy etish masalalari yuzasidan oʻz taklif va mulohazalarini bildirishdi.
Ayniqsa, inklyuziv taʼlimni rivojlantirish masalasi bugun jamiyatimiz uchun oʻta dolzarb hisoblanadi. Barcha yoshlar, jismoniy imkoniyati cheklanganlar yoki maxsus ehtiyojlarga ega shaxslar uchun taʼlim olishda teng sharoitlar yaratish, ularning jamiyatda toʻliq va faol ishtirokini taʼminlash – bu faqat ijtimoiy adolat masalasi emas, balki barqaror taraqqiyotning kafolatidir. Inklyuziv taʼlim tizimini takomillashtirish, pedagoglarni maxsus tayyorlash, infratuzilmani moslashtirish va keng jamoatchilikning bu boradagi xabardorligini oshirish boʻyicha takliflar ilgari surildi.
Taʼlim, ilm-fan va innovatsiyalar sohasidagi ijtimoiy loyihalarni qoʻllab-quvvatlash, davlat va jamoatchilik oʻrtasidagi muloqotni mustahkamlash, inklyuziv yondashuvni amaliyotga tatbiq etish kabi masalalar boʻyicha aniq chora-tadbirlar belgilab olishga kelishildi.
Jamoatchilik kengashi ushbu yoʻnalishlarda amalga oshiriladigan har qanday tashabbusni qoʻllab-quvvatlashga, fuqarolik jamiyati institutlari va vazirlik oʻrtasidagi hamkorlikni kuchaytirishga tayyor ekani bildirildi.