O‘zbekiston oliy ta’lim tizimida dual ta’limni rivojlantirish bo‘yicha press-tur o‘tkazildi
2025-02-25 18:00:00 / Vazirlik yangiliklari
Press-tur davomida davlatimiz rahbari tomonidan berilgan topshiriqlarni ijrosini ta’minlashda Oliy ta’lim, fan va innovatsiyalar vazirligi, Savdo-sanoat palatasi hamda Kambag‘allikni qisqartirish va bandlik vazirligining dual ta’lim tizimini joriy etish va uni takomillashtirish bo‘yicha hamkorligi va bu borada amalga oshirilayotgan ishlar haqida ma’lumot berildi.
Qayd etilganidek, dual ta’lim doirasida o‘quv jarayonlari haftasiga kamida ikki kun universitetda nazariy mashg‘ulotlar, qolgan kunlari esa ishlab chiqarishda amaliyot o‘tash shaklida tashkil etiladi. Ushbu tizim oliy ta’lim muassasasi, talaba va korxona o‘rtasida uch tomonlama shartnoma asosida amalga oshiriladi.
Bugungi kunda “Kasb egasi” dual ta’lim tizimi asosida tahsil olayotgan 1251 nafar talabadan 251 nafari o‘z o‘qishi bilan bir qatorda, ishlab chiqarishda ishlash orqali ish haqi ham olmoqda. O‘zbekiston hukumati tomonidan ushbu ta’lim tizimini rivojlantirish, uni kengaytirish va yanada takomillashtirish bo‘yicha qator chora-tadbirlar amalga oshirilmoqda.
Press-tur doirasida ishtirokchilar bir nechta korxonalar faoliyati bilan yaqindan tanishdilar.
Birinchi manzil “ZELAL TEKSTIL” MChJ bo‘ldi. Mazkur korxona Toshkent to‘qimachilik va yengil sanoat instituti bilan hamkorlikda 2022 yildan buyon dual ta’lim tizimini joriy etgan. Bugungi kungacha 120 nafar talaba ushbu korxonada amaliyot o‘tagan, shuningdek, 10 dan ortiq bitiruvchi ushbu korxonada doimiy ish faoliyatini olib bormoqda.
Keyingi tashrif “Nurtex” MChJ korxonasiga uyushtirildi. 2022 yildan beri talabalar ushbu korxonada dual ta’lim tizimi asosida zamonaviy texnologiyalar bilan ishlash bo‘yicha amaliy mashg‘ulotlar olib borishmoqda. Talabalarga yetuk mutaxassislar zamonaviy tikuv mashinalari, bichish dastgohlari, issiqlik bilan ishlov berish uskunalarida ishlash ko‘nikmalarini o‘rgatmoqdalar.
Press-turning so‘nggi manzili Toshkent to‘qimachilik va yengil sanoat instituti bo‘ldi. Institut hududida yangi texnopark ochildi, bu esa talabalar uchun ishlab chiqarish jarayoniga bevosita tayyorgarlik ko‘rishlariga keng imkoniyat yaratmoqda.
Kelgusida dual ta’lim tizimini yanada rivojlantirish va kengaytirish rejalashtirilgan.